U shpreh gatishmëria që të bëhen përpjekje për gjetjen e hapësirës ku do të trajtoheshin personat me autizëm.
Kryetari i Ferizajt Muharrem Svarqa, priti sot në një takim Shpresa Xhaklin, e cila vepron në Shtetet e Bashkuara të Amerikës dhe është themeluese dhe udhëheqëse e shoqatës “Autizmi”.
Në takim u bisedua për mundësinë e shtimit të kujdesit ndaj personave me autizëm në komunën e Ferizajt. Me këtë rast Shpresa Xhakli, kërkoi nga kreu i komunës që të sigurohet hapësirë e përshtatshme për trajtimin e personave të tillë.
Kryetari Svarqa e priti me kënaqësi kërkesën dhe tha se do të angazhohet që të gjejë mundësi për krijimin e hapësirës së kërkuar, në mënyrë që të mos mungojë kujdesi ndaj synimeve të shprehura nga shoqata “Autizmi”.
