Edmond Ahmetaj ka jetuar prej vitesh në Itali me gruan e tij dhe vëllain, në Noci të Barit. Që nga maji i vitit 2016 ai kishte marrë shtetësinë italiane.
Hetimet ndaj shqiptarit kanë nisur që në nëntor të vitit 2015, pas sulmit terrorist që ndodhi në Paris. Në atë kohë, 38-vjeçari ka shfaqur në rrjetin social Facebook, përbuzje për viktimat dhe vlerësoi masakrën e ISIS. Ai ka shpërndarë edhe një video në lidhje me një atentat të mundshëm në Itali, shkruan Express.
Mbikëqyrja speciale, e aplikuar në Bari e që përbën të katërtën herë kur ajo zbatohet në vendin fqinj që prej ligjit të vitit 2015, e shtrin aplikueshmërinë e masave të Antimafias edhe te krimet e terrorizmit.
Drejtësia italiane e akuzon atë për përhapjen e propagandës xhihadiste në Facebook. Ai ka pasur një sërë kontakteshe me grupe të tjera bashkëkombësish, me të cilët lëvdonte grupet terroriste.
Në profilin e tij në rrjetin social është evidentuar edhe një foto me armë lufte dhe një video me intervistën e imamit të Londrës Anjem Choudary në lidhje me një sulm të mundshëm në Romë.
