Dokumenti u botua nga Kastriot Dervishi, i cili shkroi se ky dokument “është ruajtur nga Enver Hoxha”.
Nexhmije Hoxha, e cila pas pak muajsh mbush 96-vjeç thotë se: “Në periudhën që bën fjalë dokumenti, unë kisha mbaruar provimet e maturës dhe më duhej të përgatisja dokumentet për emërimin si mësuese. Për këtë arsye, mund të më jetë dashur ky vërtetim. Por unë nuk kam firmosur asnjë dokument anëtarësimi në Rininë Fashiste dhe aq më tepër në Partinë Fashiste.
Sa për kujtesë, unë që nga viti 1936 kam qenë e organizuar në grupin komunist me Qemal Stafën.
Në 4-7 prill të ’39-s kam marrë pjesë në demonstratat e rinisë së Tiranës kundër pushtimit nga Italia fashiste dhe në vazhdim, derisa u kërcënova me arrestim dhe kalova në ilegalitet.
Sa isha studente në “Institutin e Vajzave” në Tiranë, instruktorja italiane fashiste për Gjimnastikën më dha notën 6, pavarësisht se në dëftesë të gjitha notat i kisha të larta, sepse nuk i shkoja në aksionet që organizonin fashistët për të bërë pako për ushtarët në front. Unë të gjitha këto i kam të shkruara në librat e mia të kujtimeve”.
.
