Gjatë takimit të kryetarit të Komunës së Podujevës, Agim Veliu, me Ambasadorin e SHBA-ve, Greg Delawie, është biseduar për investimet e bëra dhe zhvillimin ekonomik të Komunës së Podujevës.
Kryetari Veliu tha se orientimi strategjik i Komunës së Podujevës është investimi në bujqësi, si bazë e zhvillimit ekonomik dhe punësimit.
Në këtë aspekt, kryetari Veliu potencoi partneritetin dhe kontributin e USAID-it në kultivimin e mjedrës, partneritet ky që po vazhdon të zhvillohet suksesshëm edhe në fushat e tjera të bujqësisë.
Në takimin, ku ishte i pranishëm edhe drejtori i USAID-it, James Hope, kryetari Veliu e informoi ambasadorin Delawie edhe për investimet e bëra në projektet e ndërtimit të infrastrukturës rrugore, ambient dhe trajtimin e ujërave të zeza.
Ambasadori amerikan Delawie u shpreh se suksesi i arritur në kultivimin e mjedrës nga fermerët llapjanë, në bashkëpunim me USAID-in dhe Komunën e Podujevës, duhet të jetë model edhe për komunat e tjera për mbështetje dhe zhvillim të sektorit të bujqësisë.
Gjatë vizitës në Podujevë, ambasadori Delawie ka vizituar një fermer kultivues të mjedrës në fshatin Katunishtë dhe Këshillin e Bashkësisë Islame në Podujevë. /Lajmi.net/
