Ukraina do të jetë kundërshtari i fundit i kombëtares shqiptare para Kampionatit Evropian të kësaj vere.
Kuqezinjtë do të luajnë një miqësore me Ukrainën më 3 qershor, tetë ditë para se të sfidojnë Zvicrën në turneun francez.
Lajmin e bëri të ditur Federata Shqiptare e Futbollit me një komunikatë për media të martën mbrëma.
“Federata Shqiptare e Futbollit ka arritur marrëveshjen me homologët ukrainas për të zhvilluar një miqësore midis dy kombëtarëve në kuadër të përgatitjeve për finalet e Evropianit ‘Francë 2016’.
Sipas akordit, takimi Shqipëri-Ukrainë do të luhet në datën 3 qershor në stadiumin e Bergamos ’Atleti Azzurri d’Italia’ dhe do të nisë në orën 20:30”, thuhet në kumtesën e FSHF-së.
