Ndihmës sekretarja amerikane e shtetit, Victoria Nuland do të vizitojë sot Kosovën. Bazuar në agjendën zyrtare, Nuland pritet që të takojë krerët e shtetit duke filluar me presidentin Hashim Thaçi, kryeministrin Isa Mustafa, kryetarin e Kuvendit të Kosovës, Kadri Veseli, zëvendëskryeministrin Hajredin Kuçi, kryediplomatin Enver Hoxhaj, si dhe zëvendëskryeministrin Branimir Stojanoviq.
Nuland, me përfaqësuesit e institucioneve të Kosovës dhe me përfaqësues të shoqërisë civile, pritet të diskutojë për përparimin në zbatimin e marrëveshjeve të arritura në Bruksel në kuadër të dialogut ndërmjet Kosovës dhe Serbisë, si dhe për procesin e integrimeve evropiane dhe luftën kundër korrupsionit dhe krimit të organizuar.
Nuland gjatë vizitës së sotme në Kosovë, nuk ka paralajmëruar takim me asnjë nga liderët e opozitës.
Ndihmës sekretarja amerikane e shtetit gjatë ditës do të vizitojë edhe Tiranën, ku përveç takimit me kryeministrin Edi Rama, ajo do të realizojë takime edhe me kreun e opozitës, kreun e PD-së, Lulzim Basha.
Gjatë vizitës disa orëshe në Tiranë, Nuland pritet që të diskutojë për njërën ndër temat më aktuale në Shqipëri, ajo e reformës në drejtësi.
