Kështu të paktën ka premtuar kryeministri i Kosovës Isa Mustafa, duke aluduar në rritjen ekonomike që sipas tij, do të arrijë në 5 për qind.
Krijimi i vendeve të reja të punës në Kosovë, nuk është mision i pamundur, por për këtë duhet të ekzistojë gatishmëria institucionale dhe jo gjithmonë të mbesin në kuadër të deklarimeve, thonë përfaqësues të komunitetit të biznesit.
Kryetari i Odës Ekonomike të Kosovës, Safet Gërxhaliu, tha për Radion Evropa e Lirë, se përmirësimi i kushteve të sektorit privat, konkretisht industrisë se prodhimit, ka mundësi që të rrisë numrin e të punësuarve.
“Dhe ajo që është më interesante është fakti se prodhimi vendor, krahas rritjes dhe zhvillimit ka nevojë për mbrojtje institucionale. Prandaj, në qoftë se në Kosovë kemi 70 mijë kompani aktive dhe Qeveria me masat e veta mund të krijojë një mirëqenie dhe mbështetje, qoftë në mënyrë direkt apo indirekte dhe ato kompani të punësojnë vetëm nga një person, a nuk qenka e mundur brenda vitit çdo kompani të ketë nga një punëtor të ri”,tha Gërxhaliu
Në anën tjetër, Shpend Balija, drejtor ekzekutiv i Këshillit të Investitorëve Evropian në Kosovë, thotë se më masat e reja në pakon fiskale mund të ndikojnë pozitivisht në zhvillimin ekonomik të vendit dhe krijimin e vendeve të reja të punës.
“Përmes kësaj iniciative, unë si përfaqësues i Investitorëve Evropian, mendoj se ka potencial shumë të madh për krijimin e vendeve të reja të punës. Edhe pse sa herë që dëgjojmë premtime politike jemi skeptik, për arsye se këto premtime shumë herë edhe nuk janë plotësuar. Mirëpo, ne duhet të monitorojmë gjendjen faktike dhe reformat të cilat po ndërmerren “, u shpreh Balija.
Kryeministri i Kosovës Isa Mustafa, gjatë fushatës zgjedhore pati premtuar se për katër vite do të hap 120 mijë vende të reja të punës, që i bie nga 30 mijë për çdo vit, pjesën më të madhe në bujqësi dhe veprimtari prodhuese. Ndërkohë që premtime për hapjen e mijëra vendeve të punës gjatë fushatës patën dhënë edhe pothuaj të gjithë liderët politikë në vend.
Duke marrë për bazë premtimet e së kaluarës, Safet Gërxhaliu dyshon se deklaratat e fundit të kryeministrit Mustafa, janë politike, pasi thotë ai, ka kohë që në Kosovë ka dominuar agjenda politike duke anashkaluar situatën ekonomike.
“Të gjitha këto deklarata dhe këto që janë duke ndodhur ditëve të fundit e kam një drojë që është duke i ardhur më tepër ngjyra politike dhe zgjedhje të parakohshme”, thotë Gërxhaliu.
Për të gjitha këto, sipas Gërxhaliut, nevojitet sundim i rendit dhe ligjit.
Ndryshe, ekspertët pohojnë se autoritet kompetente kanë gabuar karshi sektorit privat. Më politikat e tyre, kanë rritur dukshëm pagat në sektorin publik, mënyrë kjo që e ka bërë të pa dëshirueshëm sektorin privat, për shkak se kompanitë private nuk kanë mundësi që të paguajnë paga të larta për punëtorët e tyre.
Paga mesatare në sektorin publik është 429 euro, derisa në sektorin privat, sipas sindikatave të punëtorëve, është rreth 300 euro.
Sipas shifrave zyrtare shkalla e papunësisë në Kosovë arrin në 26.2 për qind. Kurse, për çdo vit, në tregun e punës hyjnë 25 deri 30 mijë të rinj.
