Pasditen e sotme, në teatrin “Adriana” në Ferizaj, me pjesëmarrjen e miqve, shokëve, bashkëveprimtarëve, me pjesëmarrjen e deputetëve dhe drejtuesve e përfaqësuesve institucionak nga niveli qendror e lokal, nën organizimin e bashkëveprimtarëve në mërgim e me mbështetjen e Komunës së Ferizajt, u mbajt mbledhje komemorative në kujtim të jetës dhe veprës së veprimtarit Isak Guta.
Për të ndjerin, në emër të Kryetarit të Komunës së Ferizajt, Agim Aliu duke i shprehur ngushëllime familjes dhe bashkëveprimtarëve, foli shefi i kabinetit të Kryetarit, Albion Sherifi.
Biografinë e veprimtarit atdhetar, veprimtarit kulturor, të ndjerit, Isak Guta e paraqiti para të pranishmëve, familjari i të ndjerit, Ilir Guta.
Për veprimtarin Isak Guta evokuan kujtimet shokët e veprimtarët e tij si Imer Lladrovci e Qamil Rexhepi, të cilët çmuan lartë kontributin e veprimtarit Guta për çështjen kombëtare dhe krijimtarinë e tij letrare e artistike.
Në emër të Shoqatës “Jezerci” të pranishmëve iu drejtua me fjalë rasti, Fadil Sejdiu – bashkëvendas i të ndjerit, gjersa djali i veprimtarit Isak Guta, Arben Guta falënderoi të pranishmit për pjesëmarrjen e vlerësimin e veprës së babait të tij.
Nën tingujt e lahutës dhe vargjeve të krijuara enkas për veprimtarin Isak Guta, bashkëvendasi i tij Nazmi Hajdari, me performimin e tij artistik, mbylli këtë mbledhje komemorative.
