Kryetari i komunës së Ferizajt, Muharrem Svarqa, ka kujtuar 24 marsin, ditën kur nisën sulmet ajrore të NATO-s ndaj caqeve serbe, duke shprehur mirënjohje për të gjithë ato vende që ndihmuan Kosovën, posaçërisht NATO-n dhe SHBA-në.
‘’Sot, për të shtatëmbëdhjetin vit me radhë, kujtojmë me nderim të veçantë ditën e madhe kur mori krahë bindja se nuk ishim të harruar as të lënë vetëm, në përpjekjet tona shumë të gjata e të vuajtura për liri e pavarësi. Sot është dita të kujtojmë që 18 vite më parë, po niste një fazë e re dhe dramatike në jetën e popullit tonë: faza kulmore dhe përfundimtare e luftës që do të çonte drejt çlirimit’’, thuhet në komunikatën e kryetarit Svarqa.
