Rektori i Universitetit të Shkencave të Aplikuara në Ferizaj, Prof. Dr. Agron Bajraktari priti në takim fituesin e “Garës Studentore të Dizajnit 2016”, Drilon Rexhepi, student i Arkitekturës së Interierit dhe Dizajnit të Mobileve në USHAF.
Rektori Bajraktari ndau Mirënjohje për studentin Rexhepi dhe e falënderoi atë për përfaqësim të denjë të Universitetit me suksesin e arritur në këtë garë.
“Studentët si Driloni janë treguesi më i mirë, se universiteti më i ri publik në vend po ecë më hapa të shpejtë drejt universiteteve të zhvilluara, dhe po ashtu është tregues se studentët tanë do të jenë të barabartë në tregun evropian të punës, duke i pasur parasysh arritjet që po tregojnë edhe në ngjarjet si kjo garë”, tha Rektori.
Rektori Bajraktari u shpreh i lumtur dhe shumë më fat që USHAF po nxjerrë kuadro të tilla si Driloni, por edhe student të tjerë që kanë filluar të bëhen faktor në botën e biznesit.
Ndërsa, studenti Drilon Rexhepi falënderoi rektorin Bajraktari për Mirënjohjen, gjithashtu falënderoi edhe profesorët e USHAF për përkushtimin, mbështetjen dhe punën e palodhshme të tyre, pa të cilët, ai tha se nuk do të ishte i kompletuar në profesionin e tij.
“Ndihem i privilegjuar që jam i pari student që marr Mirënjohje. Shpresoj dhe besoj që suksese të tilla nuk do t’i mungojnë Universitetit”, tha Driloni.
