Policia e Kosovës ka lëshuar të mërkurë kërkesë për bashkëpunim me qytetarët me qëllim identifikimin dhe vendndodhjen e një personit në kërkim policor, i cili dyshohet për disa grabitje të armatosura në rajonin e Ferizaj.
Drejtoria Rajonale e Policisë në Ferizaj ka publikuar edhe fotografinë e të dyshuarit, pas autorizimit nga Prokuroria Themelore në Ferizaj.
Personi i dyshuar është Veton (Fevzi) Esati, i lindur me datë 02.06.1993 me vendbanim në fshatin Bibaj të Ferizajt.
“Deri më tani, i dyshuari nuk është paraqitur në polici dhe është në arrati. Policia kërkon nga qytetarët që, kushdo që ka ndonjë informacion rreth këtij personi për vendndodhjen e tij, të lajmërojnë menjëherë policinë, stacionin më të afërt, apo përmes aplikacionit digjital ‘’Lajmëro Policinë ‘’ dhe në numrat kujdestarë : 192 ,0290/326-250 & 0290/322-406. Të dhënat e juaja do të ruhen në konfidencialitet të plotë”, thuhet në njoftimin e policisë.
