![](https://ferizajpress.com/wp-content/uploads/2016/10/14720379-10154404264269457-673324506800286466-n_1477585948-7876358-200x300.jpg)
Forcat Speciale RENEA, ato të Batalionit Special të Ministrisë së Mbrojtjes në bashkëpunim me Forcat Speciale Amerikane, inskenuan një rast penmgarrjeje në Tiranë, dhe ndërhyrjen e forcave speciale për të shpëtuar pengjet. Rasti u improvizua tek Akademia e Arteve, ku gjithçka përfundoi me një pengmarrës të vrarë nga Forcat Speciale, 3 të arrestuar dhe shpëtimin e 15 pengjeve.
Demonstrim në kuadër të përmbylljes të stërvitjes JCET 2016.
Situata e demonstruar përfshiu një situatë pengmarrje masive në një ambientet kulturor.
Skenari i kësaj situate pengmarrje u zhvillua tek Akademia e Arteve, ku 4 persona u futën në sallën e shfaqjeve, morën peng 10-15 persona dhe kërcënuan me armë. Në kuadër të kësaj situate nga strukturat e Policisë është marrë informacion se pengmarrësit kanë 2 automatikë dhe 4 pistoleta.
Ky mësim tregues i zhvilluar nga Forcat Speciale RENEA dhe forcat të Batalionit Special të Ministrisë së Mbrojtjes, ku secili institucion në këtë rast mori detyrimet e veta në kuadër të planit të masave dhe planit operacional special.
Në terren u angazhuan forcat taktike dhe njësia e snajperëve nga të dy institucionet. Po ashtu u angazhuan edhe njësia e negocimit, njësia anti-eksploziv dhe seksioni i shërbimit ambulator të Komisariatit Special RENEA.
Veprimi i parë që u krye ishte goditja e realizuar nga një snajper ndaj një pengmarrësi, i cili doli jashtë ambienteve të godinës së bashku me një prej personave të marrë peng dhe kërcënonte se do ta vriste. Me eliminimin e pengmarrësit filloi edhe faza e parë e veprimeve taktike të strukturave.
Ndërhyrja dhe zgjidhja e situatës nga forcat speciale të të dy institucioneve përfshiu 2 faza:
– Faza e parë përfshiu afrimin e forcave nga jashtë godinës deri në afërsi të hyrjes, ku u demonstruan lëvizjet që u realizuan nga strukturat në terren në këto raste.
– Në vijim u bë një ndalesë, ku u ftuan pjesëmarrësit për të hyrë në ambientet e brendshme të Akademisë së Arteve, pasi aty u zhvillua edhe faza e dytë.
– Faza e dytë përfshiu veprimet që u kryen brenda ambienteve ku gjendeshin 10-15 pengje dhe 4 pengmarrësit e armatosur. U demonstruan veprimet për lirimin e pengjeve dhe më pas veprimet për shoqërimin e tyre në ambientet e strukturave lokale policore për intervistimin përkatës.
Në këtë aktivitet morën pjesë përfaqësues të Ambasadës Amerikane të cilët ishin edhe në rolin e organizatorit të aktivitetit, krerët më të lartë të Policisë së Shtetit, zyrtarë të lartë të Ministrisë së Punëve të Brendshme, Zv.ministri i Mbrojties, përfaqësuesit e misioneve që asistojnë Policinë e Shtetit si dhe oficerët policorë ndërlidhës të atashuar në vendin tonë.
.