Në një prononcim për mediat, Duma ka folur për një valë kriminaliteti prapa të cilës fshihet sipas saj regjia e pushtetit.
“Krimi po dominon rrugët, shtëpitë, aeroportin e vetëm kombëtar të vendit dhe portin e Durrësit. 8 tonë drogë kanë kaluar në portin e Durrësit, me bekimin e shefave, që kanë marrë pjesën e tyre. Në rrugën për në Rinas janë grabitur 3 milionë euro, mbrëmë një dyqan u grabit në kryeqytet dhe një tjetër në Elbasan. Ku është rendi dhe qeveria?”, ka thënë Duma.
Ajo ka akuzuar ministrin e Brendshëm se ka hequr dorë nga garandimi i rendit dhe sigurisë për qytetarët, duke dalë në shërbim të segmenteve kriminale.
“Në këtë tablo del Tahiri i Ramës dhe na thotë që e kanë fajin të tjerët. E ka fajin populli, kultura, videoklipet, sipas tij, por ata vetë nuk kanë asnjë faj. Duke qenë kështu, populli e kupton sa nuk i bëhet vonë Ramës për qytetarët”, ka thënë Duma, e cila ka përsëritur apelin e opozitës për protestën e 18 shkurtit.
“Jemi sot këtu për të paraqitur një kaos, të dirigjuar nga krimi i pushtetit. Shqiptarët e dinë që për të qenë të sigurtë është një e drejtë themeltare. Ne jemi para një vendimi të madh, që më 18 shkurt të nisë një erë e re”, ka thënë Duma.
