Nishani priti dje një grup aktivistësh të shoqërisë civile, të cilët kundërshtojnë ndërtimin brenda parkut të liqenit në Tiranë. Duke mbrojtur kauzën e tyre, kreu i shtetit u shpreh se “ata duhet të sensibilizojnë e motivojnë të gjithë aktorët e shoqërisë, politikbërjës dhe qytetarë, pa dallime”.
Presidenti i njohu aktivistët me shqetësimin e tij ndaj mungesës së reagimeve të institucioneve shtetërore dhe u kërkoi përfaqësuesve të qytetarëve, të vijojnë të shprehin lirshëm mendimin e tyre në mbrojtje të çështjeve të mjedisit. Nishani ofroi edhe mbështetje për rrugëtimin ligjor të aktivistëve nga hallka më e ulët dhe deri te hallka e lartë, madje dhe me stafin e juristëve të Presidencës, nëse çështja shkon në Kushtetuese.
Por kryebashkiaku Veliaj, nuk e priti mirë pozicionimin e kreut të shtetit në mbrojtje të parkut. Në një deklaratë në profilin e tij në “Twitter”, Veliaj e quajti të turpshëm qëndrimin e kreut të shtetit, ndërsa i kujtoi atij se është i vetmi që jeton me vilë në park dhe del me eskortë në park.
“Sa turp që do t’ju prishë parkun fëmijëve. Nishani, i vetmi shtetas që jeton me vilë në park dhe eskortë në pedonale”, shkruante Veliaj.
Bashkimi i institucionit më të lartë të hierarkisë shtetërore me kauzën qytetare, u prit mirë nga aktivistët, të cilët u shprehën të bindur se e mira triumfon kudo./shekulli
The post Nishani-Veliaj, përplasen për parkun e liqenit appeared first on Lajminet.
