Ishte parashikuar për në orën 21.00 por janë dashur mbi dy orë që seanca parlamentare e 21 korrikut t’u rikthehej punimeve, ku pritet të miratohet në parim drafti i ndryshimeve kushtetuese për Reformën në Drejtësi.
Tashmë pas shumë negociatave, drafti u miratua fillimisht në komisionin e posaçëm të reformës në drejtësi dhe pritet të miratohet në parim në këtë seancë të posaçme, por edhe historike për politikën shqiptare. Në seancë merr pjesë edhe kryetari i PD-së Lulzim Basha si dhe ambasadorët.
Fjalën i pari e ka marrë kryetari i komisionit të posaçem të reformës në drejtësi, Fatmir Xhafaj. Sipas tij, 3 synimet e kësaj reforme janë: konsolidimi funksional i sistemit gjyqësor, forcimi i kontrollit të brendshëm në sistemin e drejtësisë dhe pastrimi i sistemit nga gjyqtarët dhe prokurorët e korruptuar.
“Reforma synon të rikthejë besimin e qytetarëve tek ligji”, tha Xhafaj.
.
