Kuvendi Komunal i Ferizajt, miratoi draft-strategjinë për informim dhe komunikim të komunës së Ferizajt për periudhën (2016-2018), ndryshimet e propozuara nga INPO dhe dy propozimet e mediave për implementimin e politikave preferenciale ndaj operatorëve kabllor.
Para anëtarëve të Kuvendit, përfaqësuesi i transmetuesve të licensuar televiziv që veprojnë në Ferizaj, Visar Hoti propozoi që komuna e Ferizajt të nis me implementimin e politikave preferenciale ndaj operatorëve të televizionit kabllor, duke futur kështu televizionet lokale me pozicionim numerik nga 3-10.
Kjo kërkesë e përfaqësuesve medial, u përkrah fuqishëm nga grupet parlamentare në Kuvendin e Ferizajt, si dhe u votua nga të gjithë anëtarët e këtij Kuvendi.
Shefi i grupit kuvendor të LDK-së Muhamet Çerkini tha se është e pajustifikushme që televizionet lokalet të jenë në fund të listës programore, sepse qytetarët nuk i shikojnë televizionet që kanë numër mbi 100. Ai theksoi se si grup e përkrahin propozimin e mediave sepse janë pikërisht televizionet lokale ato që e ndihmojnë informimin dhe zhvillimin ekonomik të Ferizajt.
Shefi i grupit kuvendor të PDK-së Gazmend Bytyqi, tha se nëpërmjet fuqizimit të mediave,fuqizohet edhe qyteti i Ferizajt. ‘’Ferizaj paraqitet në televizione nacionale vetëm për diçka të zezë apo të jashtëzakonshme, nuk kemi asnjëherë diçka nga jeta kulturore etj’’, tha Bytyqi.
Ibrahim Hyseni nga ‘’Grupi 3 Plus’’ tha se renditja e televizioneve lokale në fund të listës programore po ua pamundëson qytetarëve ferizajas informimin. ‘’Unë jam i interesuar të shoh për rrjedhat e qytetit tim por më pamundësohet ngase humb kohë derisa të shkoj tek numri 200. Nuk po kam mundësi as biznesin tim ta reklamoj ngase atje në fund nuk e sheh askush’’, tha Hyseni.
E Bashkim Fazliu, nga Nisma për Ferizajn, tha se pozicionimi numerik i televizioneve në pakot kabllore tregon edhe pozicionimin numerik që Ferizaj e ka në çdo aspekt.
Qazim Rrahmani tha se këto 3 mediume kanë dhe janë qenë faktor të rënësishëm në Ferizaj. ‘’ Këto media ia kanë dhënë hakun qytetarëve tonë’’ tha ai.
Kurse Enver Haliti nga AAK-ja, propozoi që kryetari Svarqa të caktoj një takim me përfaqësuesit e operatorëve kabllor për të biseduar rreth mundësisë së futjes së televizioneve ferizajase në 10-shën e parë, mirëpo nëse nuk ekziston gatishmëria nga ta atëherë të caktohet një taksë për operatorët jopreferencial.
Propozimin e mediave ferizajase e përkrahu edhe Lëvizja Vetëvendosje. / TELEVIZIONI TEMA /
