Në një konferencë për medie Fazli Shabani koordinatorë i nënkomiteteve të Lëvizjes Vetëvendosje, qendra në Ferizaj, ka reaguar rreth deklaratave nga Drejtoria e Bujqësisë dhe Pylltarisë në Ferizaj në lidhje me sëmundjen virale të gjedhit.
Shabani me këtë rast ka ngritur shqetësimin se përveç deklaratave nga kjo drejtori dhe AVUK nuk është duke u bërë asgjë konkrete në lidhje me këtë sëmundje të gjedhit.
“Duke u bazuar në deklaratat dhe atë qka u tha nga Drejtoria e Bujqësisë dhe Pylltarisë në Ferizaj në lidhje me sëmundjen virale të gjedhit (sëmundja e lëkurës me xhunga) ne e pamë të nevojshme madje të patjetërsueshme që nëpërmjet kësaj deklarate të njoftojmë publikun e me theks të veçantë fermerët e komunës sonë se gjendja në realitet është shumë më e vështirë dhe me dramatike se ajo që raportohet” tha Shabani me këtë rast.
“Deklarimi se situata është nën kontroll në komunën tonë në realitet nuk është aspak e vërtetë dhe se situata nuk është fare nën kontrollë, të paktën jo nga organet përgjegjëse, qofshin këto të nivelit komunal ose atij qendrorë (AVUK, Ministri). Këtë e dëshmon edhe ajo çfarë u tha në kronikën e TV Liria nga Drejtoria e Bujqësisë. Në fakt të gjitha informatat drejtoria i jep të gjeneralizuara, që d.m.th se ata nuk kanë të dhëna të sakta, e rrjedhimisht edhe situatën reale në teren nuk e kanë në kontroll e madje as nuk e dinë se çfarë po ndodhe”
“Deklarata se gjoja AVUK-u është duke vepruar në teren është jo e vërtetë, të paktën për komunën e Ferizajt. Ajo çka është duke vepruar AVUK-u në komunën tonë është konfirmimi i sëmundjes në rastet kur raportohen nga veterinarët e terrenit, e që në fakt ky nuk mund të quhet veprim, sepse veprimi në bazë të ligjit të veterinarisë në rastin e sëmundjeve ,,të Programit të parë” është shumë kompleks (Krijimi i qendrës emergjente, mbyllja e tregjeve dhe çdo lloj aktiviteti tjetër që nënkupton grumbullimin e kafshëve, eliminimi i çdo kafshe që rezulton pozitiv dhe kafshëve të tjera të cilat kanë qenë në kontakt me të, mbajtja nën kontroll e kafshëve të tjera të rrethit ku është vërtetuar ose dyshohet për sëmundjen, vaksinimi i kafshëve të shëndosha, dhe të gjitha këto duhet kompozuar nga shteti” ka thënë Shabani.
Shabani tha se masat që janë duke u marrë nuk janë të mjaftueshme por edhe ato që po merren nuk po zbatohen.
“Të vetmet masa të cilat deri me tani janë marre nga komuna ose AVUK-u si organe përgjegjëse në këtë rast janë: Mbyllja e tregut e cila edhe ashtu nuk është bërë e plotë pasi që ajo çfarë po ndodh në realitet është mbyllja zyrtare e tregut ndërsa tregtimi i kafshëve është plotësisht i lirë e madje të shtunave tek tregu i kafshëve shihen edhe grumbullim i kafshëve dhe shitblerje e tyre” tha Shabani.
Shabani me këtë rast ka bërë thirrje tek organet kompetente për veprim të menjëhershëm, marrje të përgjegjësisë dhe të informimit të fermerëve për gjendjen reale.
