Ferizaj– Në kuadër të përgatitjeve për Festivalin e Muraleve në Ferizaj i cili pritet të mbahet së shpejti, sot u takuan artist, skulptorë, shoqëria civile dhe mediat.
Nga të pranishmit u bisedua për mundësit dhe mënyrën e organizimit sa më të mirë të këtij Festivali i cili, siç u tha, është i vetmi në Ballkan.
Në këtë tubim u përshëndet gatishmëria e Komunës për të ndihmuar por u kërkua që në të ardhmen ky Festival të hyjë në agjendën e Komunës.
“Që nga viti 2009 kamë qenë për një festival të tillë. Por të organizuar nga Komuna e jo nga organizatat dhe grupe të ndryshme,sepse vetëm si i tillë do të kishte një jetëgjatësi dhe paraprakisht do të shtynte në lëvizje edhe artistët dhe strukturat tjera që të bëhej një organizim sa më i mirë” tha Armend Pajaziti.
Edhe Arbër Kadriu nga INPO tha se kjo është një hap i mirë dhe si shoqëri civile do të japin të gjithë atë që është në mundësi të tyre që ky festival të organizohet sa më mirë po edhe të ketë një përfshirje sa më të gjerë.
“Ky do të ishte një Festival i cili do të promovonte Ferizajn por edhe do të krijonte identitetin e qytetit” tha Kadriu.
Kryetarja e Shoqatës së Artistëve Figurativ “Zef Kolombi” Lebibe Topalli tha se është duke u bërë përgatitje që ky Festival të ketë karakter ndërkombëtarë dhe të ketë një përfshirje sa më të gjera,aq sa do të lejonin edhe mundësit financiare.
Skender Bedriu dhe Përparim Behluli u shprehën të gatshëm të ndihmojnë profesionalisht këtë festival, pasi kryesisht kjo do të jetë projekt ku artistët do të shprehin kreativitetin e tyre.
Skënder Bedriu ka thënë se krahas muraleve, të aplikohen edhe forma tjera të artit urban, duke llogaritur në këtë mes edhe grafitet (street art).
Në këtë takim janë diskutuar edhe çështje që ndërlidhen me mbrojtjen e muraleve me ligj, por u theksuar problemi i planeve rregulluese urbane, sipas të cilave disa nga objektet e vjetra mund t’i nënshtrohen procesit të rrënimit të tyre e me këtë edhe muraleve.
Edhe pse sot nuk u morë ndonjë vendim për ditën e saktë të Festivalit pati disa propozime se cilat pjesë të qytetit do të bëheshin me murale.
Ky grup pritet që në ditët e ardhshme të takohet edhe njëherë për të biseduar detajisht dhe ndarjen e detyrave për secilin sektor që të bëhet një organizim sa më i mirë,pas të cilit takim do të bëhet e ditur data e mbajtjes së këtij Festivali.
Këto janë tre vendet e mundshme të cilat do të bëhen me murale.
