Kryetari i Ferizajt, Agim Aliu bashkë me drejtorët komunal, atë të Arsimit, Afrim Llabjani dhe të Shëndetësisë, Bekim Ademi pritën sot në takim, përfaqësues të GIZ-it gjerman, përkatësisht Udhëheqësen e Komponentës së Punësimit, Julia Becker dhe Këshilltaren për Masat Aktive të Tregut të Punës, Gresa Limani.
Temë e diskutimit në këtë takim ishte vazhdimi i bashkëpunimit në kuadër të projektit YES (Youth, Employment and Skills) që ka për qëllim përmirësimin e punësueshmërisë të të rinjve të moshave 15 deri në 35 vjeç, grupeve të cenueshme përmes ofrimit të një perspektive më të mirë në tregun e punës në Kosovë.
I pari i Ferizajt, Agim Aliu ofroi gjithë mbështetjen e nevojshme për këtë projekt në dobi të të rinjve i cili ka rezultuar me organizimin e panaireve të punës, skemave të praktikës në punë, subvencionimin në paga dhe skemat e ndërmarrësisë. Të kënaqur me bashkëpunimin e deritanishëm u shprehën edhe zyrtaret nga GIZ, të cilat falënderuan kreun e Komunës për vazhdimin e bashkëpunimit me rezultate direkte për punësimin e të rinjve.
