Presidenti i Turqisë, Recep Tayyip Erdogan, ka thënë se vendi i tij nuk do ta implementojë marrëveshjen me Bashkimin Evropian, për kthimin e migrantëve nga Greqia, nëse BE-ja nuk i përmbushë obligimet e veta ndaj Ankarasë.
Sipas marrëveshjes BE-Turqi, të arritur në muajin mars, Ankaraja do t’i pranojë të gjithë migrantët që kanë hyrë ilegalisht në Greqi prej 20 marsit, nëse ata nuk janë të kualifikuar për azil.
Për secilin shtetas të dëbuar të Sirisë nga Greqia në Turqi, BE-ja do ta pranoj një sirian për rivendosje.
Në shenjë reciprociteti, BE-ja ka shprehur përkushtim për të dhënë ndihmë financiare, heqjen e regjimit të vizave për shtetasit e Turqisë dhe progres në negociatat për anëtarësim të Turqisë në BE.
Erdogan tha sot se “ka pasur premtime, por asgjë nuk ka ndodhur për momentin”.
