Në një artikulli të ditës së enjte, e përditshmja “Kathimerini” nxjerr të tjera detaje duke përdorur si burim një prej efektivëve të policisë që u mor me çështjen.
Sipas dëshmisë së tij, hetimi ka pasur si indice autoritetet bullgare, sipas të cilave policia italiane e njësitit antitrafik po zhvillonte një hetim të gjerë që prej vitit 2013.
Sipas informatave të autoriteteve bullgare, anëtarët e rrjetit ndërvepronin kryesisht në Belgjikë, Holandë, Bullgari dhe Spanjë, ndërsa Greqia është përdorur si pikë transporti e narkotikëve me destinacione ndërkombëtare, që kryhej me furgonë mallrash.
Por ajo që përbën rëndësi në rrëfimin e tij është pohimi mbi personin që e kontrollonte të gjithë këtë trafik, 50-vjeçari shqiptar i identifikuar si Dhimitër P. me banim në Belgjikë dhe që njihet me pseudonimin Walter.
Sipas burimeve, ai zotëron banesa edhe në Tiranë e Athinë, ndërsa posedon llogari bankare në Greqi (366.000 euro), në Shqipëri (460.000) dhe në Belgjikë (100.000).
Personi në fjalë kishte tërhequr vëmendjen e policisë pasi në prill të vitit 2015, një prej furgonëve që po transportonte plastikë nga Brenda e Holandës për në Londër të Anglisë ishte ndalur në Kale të Francës për kontroll të imtësishëm, ku dhe ishin zbuluar edhe disa pjesëtarë të tjerë të organizatës nga kabllogramet telefonikë.
Anëtar tjetër me rëndësi të madhe, sipas dëshmitarit të gazetës greke, është edhe 44-vjeçari Klement B. i njohur ndryshe si Keli, në emër të të cilit është shpallur edhe arresti ndërkombëtar.
Por nëpërmjet mediave, vijon artikulli, gjatë së mërkurës vetë personi bëri me dije se është në punën e tij e se nuk ka lidhje me akuzat, duke i cilësuar ato të bëra nga Partia Demokratike si sulm politik.
Në mars të këtij viti, burimet konfirmojnë se Keli ka mundësuar që një kamion me barna të kalojë pa problem kontrollin doganor në të cilin ndodhej edhe droga që do shpërndahej më pas në vende të tjera të Europës.
Gjithashtu, nga përgjimet telefonike të kryera rezulton se ai është personi përgjegjës për transportin e hashashit nga jugu i Shqipërisë drejt ishujve të Jonit, nëpërmjet skafëve e mandej drejt Evropës qendrore e perëndimore.
Pjesë e këtij trafiku ishte edhe sasia e bllokuar në ishullin e Zakinthit me më shumë se 600 kg hashash, ku u arrestuan edhe dy nga bashkëpunëtorët e tij që kishin shkuar për ta shoqëruar mallin deri në destinacion.
Për këtë arsye ishte marrë me qira edhe një banesë në Lefkadha të Greqisë, ku do të bëhej depozitimi fillestar i lëndëve narkotike.
Një tjetër detaj i rëndësishëm i hetimeve është edhe fakti se anëtarët e organizatës përdornin një agjenci turistike në Athinë për kryerjen e transporteve, ku nga një kontroll në njërin prej mjeteve u gjet një shumë parash prej 32.000 eurosh. / Top Channel
The post Edhe një tjetër shqiptar bos i drogës appeared first on Lajminet.
