Sonte, në oborrin e Qendrës Kryesore të Mjekësisë Familjare, në kuadër të aktiviteteve të Javës së shëndetësisë ferizajase, në mesin e punonjësve të shumë shëndetësor, mjekëve të mirënjohur ferizajas, u hap ekspozita unike me fotografi e dokumente nga Dr. Agim Bytyqi, aktivitet ky në kuadër të ngjarjeve për shënimin e 150 vjetorit të themelimit të Ferizajt.
Kjo ekspozitë u hap me fjalën e drejtorit të DSHMS-së, Dr. Kemajl Emini i cili falënderoi punonjësit shëndetësor për kontributin ndër vite. Gjithashtu me fjalë rasti të pranishmëve iu drejtua edhe deputeti i Kuvendit të Kosovës, Elmi Reçica, i cili përveç falënderimit për kontributin e punonjësve shëndetësor, vuri theksin tek kontributi i mantelbardhëve para luftës dhe gjatë luftës së UÇK-së, çka e bën të jashtëzakonshëm kontributin e mantelbardhëve në luftën tonë për çlirim.
Me fjalë rasti, të pranishmëve iu drejtua edhe autori i ekspozitës, Dr. Agim Bytyqi, i cili shpjegoi rëndësinë e dokumentimit të të kaluarës sonë me faktografinë në fushën e shëndetësisë, gjersa profesori i historisë, Ramadan Ramadani, tha se një përmbledhje faktografike është edhe vepra monografike kushtuar shëndetësisë ferizajase, ku është bashkautorë me Dr. Agim Bytyqin, e që si përmbledhje, t’i shërbej në të ardhmen hulumtuesve të rinj në këtë lëmi.
Në këtë ngjarje, mirënjohje u ndanë për punonjësit shëndetësor që nuk janë në mesin e të gjallëve, gjersa ekspozita që pati interesim nga të pranishmit u mbyll me koktej rasti.
