Tash e tetë muaj në qendër të vëmendjes ka qenë opozita dhe kërkesat e tyre karshi Qeverisë. Por kur EULEX-it zyrtarisht i kanë mbetur edhe dy muaj mandat, çdo ditë edhe nga krerët më të lartë të shtetit po flitet për punën dhe sukseset e këtij misioni. Madje shumë raste janë shfaqur edhe kritikë.
Mirëpo, Qeveria ka paralajmëruar se do të fillojë një dialog me Bashkimin Evropian për mandatin e misionit më të madh të sundimit të ligjit.
Në të njëjtën kohë, Britania e Madhe ka dërguar në Kosovë një grup të ekspertëve për të bërë rishikimin e punës së EULEX-it, para vazhdimit eventual të një mandati shtesë për këtë mision.
Anthony Welch dhe Maureen Brown, sipas asaj që është bërë publike deri më tash ne medie, janë takuar me kryetarin e Gjykatës Supreme, Fejzullah Hasani.
Dragana Nikoliç-Solomon, shefe e Zyrës për Informim Publik në EULEX, ka thënë për Tribuna Channel përmes postës elektronike se për punën e këtij grupi ekspertësh dhe për më shumë informacion në lidhje me vlerësimin e Mbretërisë së Bashkuar për misionin e EULEX-it, të kontaktohen vetë ekspertët që po qëndrojnë në Kosovë.
Sqarim kanë dhënë në Ambasadën e Britanisë së Madhe. Merita Salihi-Munipi, zyrtare për Marrëdhënie me Publikun në këtë ambasadë, ka treguar për çka janë në Kosovë grupi i ekspertëve.
Kurse avokati Tomë Gashi ka një shpjegim se pse ky mision gjendet në Kosovë.
Britania e Madhe ka shqyrtuar mundësinë për të dalë nga Bashkimi Evropian. Prandaj, sipas Gashit, nëse ky shtet vendos të mos jetë pjesë e BE-së, nuk do të japë mjete më për EULEX-in, por nëse do të jetë i interesua që ta ndihmojë Kosovën, mjetet e dhuruara do t’i kontrollonte vet.
Për më shumë shikoni kronikën e përgatitur nga Tribuna Channel./GazetaTribuna/
