Partia Demokratike e Kosovës në Ferizaj, ka kërkuar dorëheqjen e drejtorit të Arsimit nëkëtë komunë ose shkarkimin e tij nga kryetari i komunës.
Agim Berisha, nga departamenti për arsim në PDK, tha se kjo duhet të ndodh sa më parë në mënyrë që të mos vazhdohet viktimizimi i 28 mijë nxënësve.
Sipas Berishës arsimi ferizajas është duke u degraduar ditë e më shumë.
Komunikatën e plotë mund ta lexoni në vazhdim:
Që nga ardhja e kësaj qeverie, arsimi si njëra ndër shtyllat më specifike dhe më me peshë e një shoqërie është keqtrajtuar dhe politizuar skajshmërisht për qëllime të përfitimeve politike të një kaste të caktuar personash që e degraduan sistemin arsimor.
E para: Largimin e drejtorëve më të suksesshëm nga shkollat dhe zëvendësimi i tyre me persona të dështuar, me biografi të mjegulluar, madje sjellja e disave nga jashtë (që nuk i plotësonin kriteret e konkursit), të cilët në vitet e 90-ta e kishin braktisur shkollën shqipe, atëherë kur i duheshin më shumë se kurrë. Veprime këto që, sa ishin irrituese, po aq ishin fyese dhe të turpshme për mësimdhënësit e viteve të 90-ta, ky ishte vetëm fillimi i një politike të mbrapshtë dhe shkatërruese ndaj sistemit arsimor në komunën e Ferizajt.
E dyta: Punësimet pa konkurs dhe pa kritere, mospërfillja profesionale dhe moszbatimi i ligjeve të MASHT-it nga kjo bashkëkeqqeverisje si dhe punësimet e militantëve, vetëm të anëtarësisë së LDK-së dhe AAK-së është kulmi i turpeve të kësaj kaste sunduese.
Politikë e pakripur e pa të ardhme, e cila po e dëmton rëndë të nesërmen e brezit shkollar, duke krijuar boshllëqe në rrugëtimin e dijes së tyre.
E treta: Punësimet me nga një gjysmënormë, kjo është një risi tjetër e keqe e kësaj bashkëkeqqeverisje, e papranueshme në aspektin praktik e pedagogjik.
Pra, për katër norma i punësojnë tetë veta, ky është shembulli më absurd. Veprohet kështu me qëllime të caktuara politike, blerjen e votave përmes punësimeve në arsim.
* A s’është ky politizim i shkollës sonë?
* A s’është ky kushtëzim dhe presion politik ndaj mësimdhënësve?
Presionet e tilla politike, për fat të keq na kujtojnë sistemin dhe vitet nën sundim që thyen qafën njëherë e përgjithmonë.
E katërta: Rritja e numrit të nxënësve në klasat e dhjeta nga 32 në 45 e më tepër, si dhe formimi i paraleleve të reja është një degradim tjetër që i bëhet arsimit nga kjo bashkëkeqqeverisje, e cila po e vret vullnetin e nxënësve dhe mësimdhënësve për një mësim më cilësor.
Të regjistrohen nxënësit me sukses të mjaftueshëm e të mirë në Gjimnaz, unë nuk di se cili kriter është përdorur. Por, kështu po rrënohet sistemi i arsimit nga vetë ata që duhet ta mbrojnë.
E pesta: Pa mëdyshje është edhe një dobësi tjetër caktimi i ushtruesve në vend të drejtorëve dhe zëvendësdrejtorëve. Kjo tani është bërë dukuri në shkollat e komunës së Ferizajt dhe nuk e dimë se kur do të ndalet kjo e keqe. Pse nuk zgjedhen, po qeveria aktuale i mbanë në ethe, mbase edhe ky është presion dhe një pazar në vete.
MASHT-i çka pret, ku në komunën e tretë në nivel të Republikës e ka arsimin në një deregje të tillë. Prandaj shtrohet pyetja pse nuk inspektohet kjo drejtori nga MASHT-i siç veproi në Malishevë.
Mos vallë nepotizmi a korrupsioni i paska shtrirë rrënjët deri te Ministria?!
Mendojmë se është përgjegjësi e MASHT-it të veprojë sa më shpejt që është e mundur sepse organet komunale nuk duan ta prishin jaraninë e tyre me komunarët, apo janë peng i korrupsionit, prandaj po heshtin ndaj këtyre dukurive, të cilat nuk po gjejnë zgjidhje assesi.
Përmbyllje: zotëri kryetar, me këtë drejtues të drejtorisë së arsimit as që pritet të ndyshojë gjendja për të mirë, vetëm sa do të përkeqësohet edhe më shumë, prandaj ndërrojeni një orë e më parë, mos i viktimizoni 28 mijë nxënës se është e pafalshme për ju.
Po si duket këtë mundësi nuk e keni, por veprimi tjetër është në vullnetin tuaj, prandaj dorëhiquni, sepse do të liroheni nga një barrë kaq e madhe e mëkateve që keni ndaj këtyre nxënësve.
