Në mbledhjen e sotme të Ministrave të Jashtëm të vendeve të BE, KiE ndalet tek paragrafi që flet për marrëdhëniet e Shqipërisë me fqinjët.
Brukseli këshillon vendin tonë që të bëjë kujdes me gjuhën retorike dhe të mos bëjë deklarata në dëm të marrëdhënieve të fqinjësisë së mirë.
“Këshilli mirëpret vazhdimin e angazhimit konstruktiv në bashkëpunimin rajonal dhe nënvizon rëndësinë për të siguruar marrëdhënie të mira të fqinjësisë, çka është thelbësore. Veprime apo deklarata të cilat ndikojnë negativisht në marrëdhëniet e mira fqinjësore, duhet të shmangen”, thuhet në paragrafin e fundit të KiE.
Ministri i Jashtëm i Greqisë Nikos Kotzias ka arritur qëllimin e tij, i cili kërkoi në mbledhjen që u mbajt në Bruksel të caktohet ndër kushtet kryesore edhe respektimi i të drejtave të minoriteteve dhe respektimi i pronës.
Disa javë më parë, Greqia reagoi për problemet e brendshme të Shqipërisë, duke akuzuar Qeverinë për shembjet e banesave të minoritetit grek në Himarë. Kryeministri Rama dhe ministri Bushati reaguan ashpër dhe duke mos ulur tonet.
.
