Aleanca për Ardhmërinë e Kosovës, ka kundërshtuar mbajtjen e zgjedhjeve të Serbisë në vendin tonë dhe në të njëjtën kohë ka kritikuar qeverinë e Kosovës për lejim të mbajtjes së këtyre zgjedhjeve.
AAK thotë se votimet për zgjedhjet parlamentare të Serbisë edhe në Kosovë janë të papranueshme.
“Qëndrimi i intitucioneve të Republikës së Kosovës, për të lejuar që të votohet në Kosovë për zgjedhjet e një shteti tjetër, është shkelje e rëndë e sovranitetit dhe të kushtetutës së vendit”, thuhet në reagimin e AAK-së.
“Kjo është një goditje edhe për përpjekjet për integrimin e pakicës sërbe në institucionet e Kosovës. Koncesionet që Qeveria e Kosovës po i bën Qeverisë së Serbisë, siç janë edhe votimet në Kosovë, për zgjedhjet e Serbisë, janë edhe kundër vetë interesit të popullatës serbe”.
“Ne me Serbinë jemi dy shtete të pavarura dhe çdo përpjekje për të ndërhyrë në sistemet e mbrendshëm të njëra-tjetrës, dëmtojnë edhe stabilitetin rajonal”.
“Qeveria e Prishtinës që e ka humbur legjitimitetin e saj dhe nuk mund të punojë më, në kundërshtim me interesat e qytetarëve të Kosovës”, thuhet në reagimin e AAK-së./
