Bashkë me falënderimet, shefi i mazhorancës ndau edhe një ndjesë për ndërkombëtarët, për negociatat e gjata dhe ngërçin e zgjatur në kohë mes mazhorancës dhe opozitës. Rama përmendi me emra liderët botërorë që kanë mbështetur këtë proces reformues në Shqipëri, duke nisur nga presidenti Obama e deri tek ndihmës sekretarja amerikane e shteti Victoria Nuland.
“Nëse do të vendosja një ditë të shkruhej në libër dhe të rreshtoja ç’më kanë parë sytë e ç’më kanë dëgjuar veshët, jam i bindur se nuk do të gjendej një lexues i vetëm të besonte. Por nuk besoj se do ta shkruaj librin, se do sëkëlldiseshin disa përfaqësues të popullit, dhe do të tronditej e gjithë bashkësia e ndërkombëtarëve. Pa këta miq, kjo ditë e sotme votimi konsensual për reformën e vonuar 25 vjet nuk do kishte ardhur kurrë nga fara e një politike të mbrapshtë me 7 koka që jeton duke sharë e përçare. Ndaj ishte e vështirë e për shumëkënd aq e pamundur për një reformë që do të nxjerrë tymin e zi nga pallati i drejtësisë. Një falënderim dhe një ndjesë për çdo mik ndërkombëtar të Shqipërisë, që nga ambasadorët në sallë, posaçërisht ambasadori i SHBA dhe ajo e BE. Të cilët e meritojnë një duartrokitje jo vetëm falënderimi por edhe ndjese. E më pas deri tek presidenti Obama, kancelarja Merkele, presidenti Hollande, kryeministri Renzzi, sekretari i shtetit John Kerry, Mogherini, komisionerin Hahn, dhe në fund miken e shtrenjtë Victoria Nuland. Këta miq i dhanë shprehje një angazhimi të jashtëzakonshëm si kurrë ndonjëherë në Shqipërinë e këtyre 25 vjetëve për t’i çelur shqiptarëve rrugën e drejtësisë. Ne do t’i mbajmë mend me figurë dhe emër miqtë e shtrenjtë që përmenda”, tha Rama.
Kreu i qeverisë tha se reforma nuk do të ketë fryte nëse nuk miratohet me konsnesu të plotë dhe vullnet për ta zbatuar atë në përpikëri me kushtetutën e re.
“Në këtë konsensus të pamendueshëm, jemi një pjesë nga malli e një pjesë nga halli kjo nesër nuk do ketë jetë. Vota e sotme do hapë një revolucion në drejtësi. Aleatët strategjik do të jenë tashmë me një rol kushtetues pjesë e procesit në çdo hap. Ky proces nuk do ketë asnjë hap më të lehtë sesa ky që hodhi sot”, tha Rama.
.
