Hoxha nga Drenasi, Osman Musliu, sot ka qenë mysafirë në Bec të Gjakovës, te miku i tij i besimit katolik, Marian Doda, i cili ka shtruar iftar për të në muajin e shenjtë të Ramazanit.
Mulla Osmani ka postuar disa foto në profilin e tij në Facebok, në mesin e besimtarëve katolikë, për t’u kundërpërgjigjur atyre që mundohen t’i ndajnë shqiptarët mbi baza fetare.
Postimin e tij mund ta lexoni të plotë më poshtë:
“Sot jam mysafir në iftar tek i nderuar dhe shume i respektuari Marian Ndoja nga fshati BEC Komuna e Gjakovës njëherit Drejtori i shkollës së fshatit, mik i imi dhe familjes time. Është i besimit katolik por me të cilët kemi jetuar me shekuj në respekt reciprok dhe mbajtur lidhjet vëllazërore. Ata te cilët fenë dhe besimin e kanë me bindje e përkushtim, dhe jo për para, interes apo kontrabandim jetojnë kësisoj pa asnjë problem. Shpresoj që të na shtohet numri i besimtarëve të sinqertë dhe mos të biem në grackën e atyre që fenë e kanë bërë para apo biznes …!? Për ata që kohet e fundit mundohen me mish e shpirt të na ndajnë në baza fetare kjo është një përgjigjeje. Edhe pas këtij iftari Mariani mbetet katolik e unë mbetem musliman por vëllezër të vërtetë. Ndërsa respekti ndërmjet nesh është shtuar dhe vazhdon. Shpresoj që kjo traditë e tolerancës të vazhdohet edhe nga gjeneratat e reja në të ardhmen… Respekt dhe nderim për familjen NDOJA, Zoti ju nderoftë.!” (sic.), ka shkruar ai.
