Pajisja “IMSI Catcher” e modelit “Vortex Air”, e cila është futur në Shqipëri nga policia italiane, nuk është në gjendje që të bëjë përgjime të bisedave audio, të SMS-ve si dhe të të dhënave të shkëmbyera nëpërmjet telefonave.
Kjo është përgjigjja zyrtare që Ministria e Brendshme italiane u dërgon autoriteteve shqiptare, të interesuara për këtë pajisje. Në një letër, kësaj radhe me firmë dhe me vulë zyrtare të firmosur nga drejtuesi i parë inxhinier i policisë së shtetit italian.
Letra e datës 5 qershor i është dorëzuar në dorë dhe në zyren e tij, kryeprokurorit Adriatik Llalla nga ambasadori italian në Tiranë.
Në letrën e firmosur nga drejtori i parë inxhinier i policisë italiane, Gianpaolo Zambonini dhe të disponuar të enjten nga Top Channel shpjegohen detajet teknike të pajisjes, e cila është një model “Vortex Air”, prodhuar nga shoqëria franceze “Ercom”.
Kjo pajisje bën lokalizimin gjeografik të përdoruesve të telefonave celularë në një zonë të lokalizuar sipas teknologjisë. Kjo zonë shkon nga 400 metra deri në 900 metra.
“Pajisja është përdorur nga shërbimi i policisë shkencore për të realizuar trajnimin dhe stërvitjen e policisë shqiptare, në kuadër të bashkëpunimit për të luftuar krimin e organizuar, terrorizmin dhe trafikun e qënieve njerëzore. Pajisja bën identifikim dhe lokalizim të pajisjeve telefonike celulare në një zonë të caktuar”, thuhet në letër.
Sipas detajimeve teknike, pajisja dallon aparatet transmetues radiomobile në zonën operative për çdo operator telefonik në transmetimet e llojeve 2G, 3G dhe 4G. Nga pajisjet e evidentuara përzgjidhen ato që kalojnë në fazën e dytë. Në këtë fazë bëhet regjistrimi i telefonave në përdorim të cilët i komunikojnë pajisjes identitetin, të dhënat IMSI të kartës telefonike dhe IMEI të aparatit telefonik.
Pajisja bën edhe lokalizimin gjeografik të vendndodhjes të telefonit. Përcaktimin e pozicionit gjeografik pajisja e bën duke matur forcën e sinjalit transmetues të lidhur me pajisjen, e cila vlerëson drejtimin dhe distancën.
Drejtuesi i lartë i policisë italiane, në përgjigjien zyrtare të firmosur, shkruan se në kuadër të bashkëpunimit, personeli shqiptar është përfshirë në aktivitetet trajnuese në klasë ashtu edhe në stërvitjen në terren.
Gianpaolo Zambonini shkruan se operatorët e përzgjedhur nga autoritetet lokale, kanë mundur të përvetësojnë elementet e teorisë për rrjetet radio-lëvizëse të nevojshme në punën e mëtejshme në konfiguracionin optimal të instrumentit. Ata janë stërvitur duke ndjekur dy fazat teknike dhe dy tipologjitë e aktivitetit teknik për këtë pajisje. Në fund, letra mbyllet me një paragraf që i jep përgjigjie dhe njëkohësisht rrëzon gjithë aludimet e ngritura.
“Sistemi nuk është në gjendje të realizojë aktivitete të tjera teknike përveç atyre të përshkruara. Në veçanti nuk është në gjendje të realizoje asnjëlloj përgjimi, as audio, as SMS dhe as të dhëna të tjera”, shkruan drejtuesi i lartë i policisë italiane.
Letra e dytë e policisë italiane vjen pas të parës, e cila u kontestua pasi nuk kishte vulën e policisë dhe personi që e kishte firmosur, prefekti Pansa, ishte shkarkuar pikërisht ditën e firmës.
Por letra e dytë mban firmën dhe vulën e drejtorit teknik të policisë italiane dhe i është dorëzuar të hënën e shkuar në zyrë kryeprokurorit Adriatik Llalla.
The post Italianët: Nuk ka përgjime, pajisja u përdor për stërvitje appeared first on Lajminet.
