Skena politike austriake tronditet si asnjëherë më parë në historinë e saj prej pas Luftës së Dytë Botërore. Kështu, në raundin e parë të zgjedhjeve presindenciale ka fituar Norbert Hofer nga Partia e Lirisë (FPÖ) i cili në raundin e parë fitoi rreth 36.7 përqind të votave. Fitorja e partisë së ekstremit të djathtë, e cila ndjek politikë anti-emigracion, sipas mediave të huaja, ka qenë një thirrje për zgjimin nga komoditeti politik i krijuar në Vjenë, dy vjet para zgjedhjeve të ardhshme të përgjithshme.
Meqë kandidati i djathtë s’e ka fituar shumicën prej 50 përqind, sipas të gjitha gjasave kundërkandidati i tij do të jetë ekologjisti Alexander van der Bellen i cili ka marrë rreth 22 përqind të votave.
Kandidatët e dy partive popullore kanë mbetur dukshëm prapa me nga 11 përkatësisht 12 përqind të votave. Kjo është hera e parë që nga viti 1945 që Austria nuk do të ketë një president nga radhët e Social-Demokratëve (SPÖ) apo Partisë Popullore (ÖVP). /Gazeta Blic/
