Kryeministri i Republikës së Kosovës, Isa Mustafa, priti sot në takim ministrin gjerman të Shtetit për Evropë, Michael Roth dhe sekretarin francez të Shtetit për Çështje të Evropës, Harlem Desir, nga të cilët kërkoi përkrahjen e shteteve të tyre për liberalizimin e vizave për Kosovën.
Siç thuhet në një komunikatë dërguar nga Zyra e Kryeministrit, në takim, ku ishte i pranishëm edhe ministri i Integrimit Evropian, Bekim Çollaku, kryeministri Mustafa i njoftoi për progresin konkret në zhvillimin ekonomik, për proceset integruese evropiane dhe reformat tjera në fuqizimin e shtetit.
Ndërsa, kryeministri Mustafa theksoi punën e madhe që po bëhet në implementimin e MSA-së, me përkrahje të gjerë, si dhe për rëndësinë që ka për Kosovën liberalizimi i vizave.
“Ne i kemi përmbushur kriteret dhe tani presim vendimin politik të BE-së. Kosovarët kanë mbetur qytetarët e vetëm të rajonit që nuk mund të lëvizin të lirë, që është e padrejtë. Andaj, ne besojmë që BE-ja së shpejti do të marr vendim pozitiv për liberalizimin e vizave, duke qenë se lëvizja e lirë është e rëndësishme edhe për MSA-në, pasi që do t’ia lehtësonte bizneseve kosovare të marrin pjesë në panaire, të gjejnë tregje adekuate dhe t’i shfrytëzojnë pa vështirësi mundësitë ekonomike e tregtare që iu krijon MSA-ja”, citohet të ketë thënë kryeministri.
Duke falënderuar për kontributin e madh të Gjermanisë dhe të Francës për Kosovën në të gjitha fazat e deritashme, kryeministri Mustafa, po ashtu, kërkoi përkrahje të mëtejshme të tyre në rrugën integruese evropiane, zhvillimin ekonomik dhe proceset e tjera.
Me këtë rast, kryeministri Mustafa shprehu përkushtimin e Qeverisë së Kosovës për bashkëpunim të gjithanshëm me Gjermaninë dhe me Francën.
Ndërsa, ministri gjerman i Shtetit për Evropë, Michael Roth, vlerësoi progresin në Kosovë duke shprehur përkrahjen e mëtejshme të Gjermanisë.
Ministri Roth tha se kjo vizitë është dëshmi e përkushtimit të Gjermanisë dhe të Francës për Kosovën dhe për tërë rajonin.
Në anën tjetër, sekretari francez i Shtetit për Çështje Evropiane, Harlem Desir çmoi të arriturat e Kosovës dhe përkushtimin e Qeverisë së Kosovës për të adresuar një varg çështjesh të rëndësishme.
Sekretari Desir foli edhe për përgatitjet e Samitit të Parisit, i cili do të mbahet në vazhdën e Procesit të Berlinit, si proces tejet i rëndësishëm i bashkëpunimit dhe zhvillimit për vendet e Ballkanit Perëndimor.
Gjatë takimit, u bisedua edhe për proceset tjera që lidhen me Kosovën, për zhvillimet politike, dialogun me shtetet fqinje, etj. /KosovaPress/
