Deputetja tashmë e pavarur Donika Kadaj-Bujupi, ka rrëfyer qëndrimin në burg kur u arrestua për hedhjen e gazit lotsjellës në Kuvendin e Kosovës, në emisionin “Natën” me aktorin Fatmir Spahiu.
Ish-zyrtarja e lartë e AAK-së, Donika Kadaj-Bujupi, ka treguar për përshtypjet e saja gjatë kohës së kaluar në burg.
“Ditën që më arrestuan, fëmijët kërkuan që mëngjesin ta bëj më herët sesa zakonisht. Kur erdhën Policia nuk ishte momenti më i keq për mua. Momenti më i keq ishte kur më dërguan në burg dhe më than se të gjitha gjërat duhet t’i bëja vet për qelin time. Thasët, jorganin, të gjitha i qova vet në qeli”, ka treguar Kadaj-Bujupi, transmeton lajmi.net
Ajo e ka vlerësuar lart sjelljen e zyrtarëve të burgut, dhe ka shtuar se është ndjerë mirë që është trajtuar barabartë me të burgosurat e tjera.
Ajo ka thënë se nuk ka krijuar miqësi me ndonjë grua në burg, pasi në qeli ka qenë e vetme, ndërkaq ka folur edhe për studimet.
“Kam studiuar për gazetari, kam bërë master dhe në fund kam kaluar në anën e gabuar. Në vend se të rri në gazetari dhe të luftojë të keqen kam kaluar në politikë”, shtoi Kadaj-Bujupi. (Lajmi.net)
