Sot në Ferizaj u hap panairi dy ditor i makinerive dhe aksesorëve për përpunimin e drurit, organizuar nga kompania “Euro Swiss”, e cila është importuese e këtyre pajisjeve, me theks të veçantë në makineri për prodhimin e mobilieve.
Në këtë panair, të interesuarit kanë mundësinë të vizitojnë nga afër ekspozitën e makinerive dhe të informohen mbi teknologjitë më të fundit në fushën e përpunimit të drurit.
Panairin e vizitoi edhe Drejtori i Zhvillimit Ekonomik në Ferizaj, Balton Derguti, i cili u prit nga pronari i kompanisë, Bujar Baliu. Me këtë rast, Baliu e njoftoi drejtorin Derguti se kompania “Euro Swiss” importon makineri dhe aksesorë kryesisht nga Zvicra, Gjermania dhe Austria, duke u ofruar përpunuesve të drurit në Kosovë mundësinë që të furnizohen direkt në Ferizaj, pa pasur nevojë të udhëtojnë në shtete të ndryshme evropiane.
Përveç importit, kompania merret edhe me prodhimin e mobilieve të ndryshme nga druri dhe aktualisht eksporton produktet e saj në disa shtete evropiane, me theks të veçantë në Zvicër, ku ”Euro Swiss” ka edhe përfaqësinë e saj zyrtare.
Panairi do të jetë i hapur edhe nesër dhe ftohen të gjithë të interesuarit ta vizitojnë.
