Një burrë nga Ferizaj ka vdekur pasi që dyshohet se ka rënë aksidentalisht në lumin Morava afër pikës kufitare Dheu i Bardhë.
“Policia e Kosovës, Stacioni Policor Ranilluk ka njoftuar se kanë marrë një informatë më 05.03.2024 rreth orës 16:00 se një person mashkull shqiptar shtetas i Kosovës (R. M. 1955) nga Ferizaj dyshohet se ka rënë në lumin Morava, afër pikës kufitare Dheu i Bardhë” – njofton zëdhënësi i Policisë për rajonin e Gjilanit, Ismet Hashani.
Trupi i viktimës, sipas njoftimit, dyshohet se ishte bartur nga uji në territorin e Serbisë dhe është nxjerrë në afërsi të pikës kufitare.
“Sipas informatave të para i ndjeri së bashku me fëmijët e tij (djalin dhe vajzën) me veturë ishin nisur në drejtim të pikës kufitare Dheu i Bardhë. Në afërsi të parkingut afër pikës kufitare, viktima është afruar afër lumit dhe dyshohet se ai ka rënë aksidentalisht në lumë” – ka thënë zëdhënësi i Policisë Ismet Hashani.
Për këtë rast është njoftuar edhe prokurori i shtetit, i cili ka urdhëruar që trupi i pajetë të dërgohet në Institutin e Mjekësisë Ligjore për obduksion.
Rrethanat e vdekjes po hetohen nga Policia rajonale e Gjilanit
