Qeveria e Kosovës ka bërë publike Investimet Kapitale për vitin 2024 për komunat e Kosovës.
Ne tabelat e publikuara nga Instituti GAP del se Ferizaj është ”fshirë nga harta”
Në këtë tabelë komuna e Ferizajt nuk figuron me asnjë invesitim të ri kapital për vitin 2024.
Për këtë përmes një komunikate për media ka reaguar edhe Komuna e Ferizajt.
“Kujt po i pengon zhvillimi i hovshëm i Ferizajt? A meritojnë ferizajasit të mos figurojnë askund në tabelën e investimeve të Qeverisë së Kosovës? Kujt i shërben Qeveria, të gjithë qytetarëve apo vetëm komunave të linjës së njejtë politike me Qeverinë? “ janë disa nga pyetjet që bëhen në këtë komunikatë.
Reagimi i plotë i Komunës së Ferizajt
Se Komuna e Ferizajt është anashkaluar në projeksionet buxhetore të Qeverisë së tanishme të Republikës së Kosovës e kemi thënë kaherë, por që të mbetet qyteti taksëpagues më i madhi e i pari nga të gjitha komunat, përjashto kryeqytetin, pa asnjë cent investime kapitale nga Qeveria e Kosovës, kjo është e paprecedent në gjithë historinë politike të pasluftës.
Një ndasi politike kaq agresive, me këtë qasje skajshmërisht refuzuese për nevojat për investime kapitale në dobi të qytetarëve të Ferizajt, thënë më së lehti, është jomeritore nga ana e Qeverisë së Republikës së Kosovës.
Kujt po i pengon zhvillimi i hovshëm i Ferizajt?
A meritojnë ferizajasit të mos figurojnë askund në tabelën e investimeve të Qeverisë së Kosovës?
Kujt i shërben Qeveria, të gjithë qytetarëve apo vetëm komunave të linjës së njëjtë politike me Qeverinë?
Ferizaj do të ngadhënjej, zhvillimin e ritmin e punëve, nuk ka forcë që do ta ndal, i takon qytetarëve të vlerësojnë vet, të zgjedhurit e tyre në nivel qendror, që me heshtje tentojnë ta kalojnë këtë turp, ngaqë si gjithmonë, nuk përfaqësuan as dje, as sot, as nesër interesat e Ferizajt e ferizajasve nga të cilët morën besimin, fakte këto për të cilat ferizajasit nuk harrojnë.
Tabela: Investimet e reja kapitale nga niveli qendror në komuna për vitin 2024 
Burimi: Instituti GAP
