Kryetari i Asociacionit të Komunave të Kosovës, Agim Aliu sot në takimin e kryetarëve të komunave me kryeministrin e Kosovës, Albin Kurti dhe me disa nga ministrat e Qeverisë ka parashtruar disa kërkesa të komunave për ekzekutivin.
Në këtë takim, Aliu ka folur edhe për çështjen e faljes së 100 eurove të tatimit në pronë e çështje tjera si dhe ka parashtruar të shtatë kërkesat.
Si kërkesa urgjente drejtuar qeverisë janë:
Kundërshtimi për bartjen e përgjegjësisë së faljes së Tatimit në Pronë tek Komunat, sepse kjo cenon të hyrat vetanake nga të cilat varen në masë të madhe projektet kapitale në komuna.
Urgjentisht të barten mjetet e të hyrave vetanake në komuna, për momentin të pezulluara.
Të themelohet Granti i IV që do të krijoj barazi financiare për Komunat e Kosovës.
Kërkojmë përshpejtimin e nxjerrjes së akteve nënligjore (në bazë të Ligjit të ri për Zyrtarët Publik) që rregullojnë procedurat e rekrutimit në komuna, me theks lejimin e listës pritëse në arsim dhe shëndetësisë.
Komunave t’u kthehen pronat nga AKP-ja, prona këto që janë përcaktuar dhe të shpallura nga komunat për interes publik e për të cilat komunat i kanë nisur procedurat e projekteve dhe kanë njoftuar me shkrim nivelin qendror.
Të krijohen mekanizma ligjor për bartjen e pronave të menaxhuara nga Agjencia e Pyjeve për zhvillim të projekteve si dhe në raste të tjera të ketë shmangie të procedurave burokratike për dhënien e lejeve për zhvillim të projekteve komunale.
Të mos lejohet që Zonat Ekonomike në komuna të kalojnë në përgjegjësi të nivelit qendror por të vazhdojnë të administrohen nga Komunat.
Pas takimit, kryetari i Asociacionit të Komunave të Kosovës Agim Aliu, është pyetur nëse komunat kanë dhënë ndonjë datë deri kur presin që këto të hyra të ju kthehen.
Ai ka thënë se në takimin e sotëm ka pasë vullnet për të zgjidhur këtë çështje.
“Unë nuk njoh asnjë kryetar komune që ka qasje ultimative, as unë nuk kam qasje të tillë, është qasje komunikimi dhe komunikimi duhet të jetë i sinqertë dhe zhbllokues. Besoj se duhet të kemi dakordësi dhe jo formë ultimative. Nuk po besoj se vije puna që kjo çështje të shkojë të Gjykatën Kushtetuese. Takimi i sotëm ka treguar vullnet se kemi energji për t’i zgjidhur këto çështje”- ka thënë kryetari i Ferizajt.
Lidhur me çështjen e të hyrave vetanake të komunave ka folur edhe kryetari i Gjilanit, Alban Hyseni i cili ka thënë se komuna që udhëheq ai nuk përballet me këtë problematikë sepse shumicën e mjeteve i kanë shpenzuar.
Ndërsa, ai ka thënë se për çështjen e tatimit në pronë sot janë dakorduar që do të mbahen takime tjera për këtë pikë.
Hyseni tutje ka folur për ankesat që kanë kryetarët e komunave tjera lidhur me qasjen dhe komunikimin me ministrat e Qeverisë Kurti.
“Për dallim nga e kaluara ku haptazi janë përkrahur komunat politikisht, tash nuk ndodh një gjë e tillë, mund të ndodh që kërkesat që ne i kem mund të jenë më të arsyeshme dhe të zgjidhen me shpejtë”- ka thënë Hyseni.
Ai ka thënë se edhe kryetarëve që vijnë nga radhët e Lëvizjes Vetëvendosje, u ndodh që të mos u përgjigjen ministrat e kabinetit Qeveritar.
“Ndodh që nuk na e hap telefonin as neve. Nuk është komunikimi i atillë që mund të pretendohet. Unë e kuptoj ministrin që ka agjendë dhe nuk mundet me hapë telefonin. Nëse kryetarët e komunave pretendojnë që ministri duhet me qenë 24 orë në shërbim të komunës kjo është pak e tepërt”- ka thënë Hyseni.
