Kryeministri i Kosovës, Ramush Haradinaj ka reaguar ndaj tenderit publik për blerjen e produkteve serbe.
Ai përmes një publikimi në Facebook ka thënë se shpallja e këtij tenderi është në kundërshtim me ligjet në fuqi dhe se pas identifikimit të personave përgjegjës do të fillohet procedura disiplinore dhe penale.
“Sot, në media jam njoftuar për tenderin e shpallur nga AQP, e që mund të jetë në kundërshtim me ligjet e prokurimit publik. Tashmë kemi kontaktuar institucionet përgjegjëse dhe jemi në pritje të qartësimit të problemit dhe identifikimit të personave përgjegjës, ndaj të cilëve menjëherë do të fillohet procedura në përputhje me ligjet në fuqi”, ka shkruar Haradinaj.
KALLXO.com raportoi sot lidhur me tenderin e Agjencisë Qendrore e Prokurimit e cila po kërkon të blejë prodhime të Serbisë për t’i furnizuar disa institucione, përkundër që Qeveria e Kosovës i ka vendosur taksën doganore prej 100% mallrave të importuara nga Serbia.
Kjo Agjenci, që bën prokurime për të gjitha institucionet, në emërtimin e produkteve që synon t’i blejë ka vendosur marka të prodhuesve të caktuar.
Vendosja e markave të prodhueseve është e ndaluar me nenin 28 të Ligjit të Prokurimit Publik.
Kjo Agjenci duke u thirrur në kushte të jashtëzakonshme për t’i përshkruar produktet që synon t’i blejë i ka referuar me artikull specifik të prodhuesve serb.
Në tenderin, që është i ndarë në 9 llote dhe që pritet të kushtojë rreth 23.5 milionë euro, tek specifikat teknike janë edhe artikujt: “EuroKrem”, “Plazma”, “Vegetë”, “Pop-Kek”, apo pashtetën e pulës “Argeta”.
Disa prej produkteve të referuara janë të prodhuara në Serbi, ndaj të cilave qeveria e Kosovës ka vendosur taksën 100%.
Pika 7 e nenit 28 të Ligjit të Prokurimit Publik e ndalon që Autoritetet Kontraktuese në specifikimet teknike t’i referohen një artikulli ose burimi të veçantë.
“Autoriteti kontraktues nuk do të përpilojë specifikimet teknike që i referohen një artikulli ose burimi të veçantë, ose një procesi të hollësishëm, ose ndonjë shenje dalluese, lloji ose origjine të veçantë ose ndonjë prodhimi”, thuhet në pikën 7 të nenit 28 të Ligjit të Prokurimit Publik.
E njëjta pikë e këtij neni lë hapësirë për Institucionet që t’i referohen edhe me artikuj të veçantë, por “ne kushte të jashtëzakonshme”.
“Pavarësisht nga e mësipërmja, autoriteti kontraktues mundet, që në kushte të jashtëzakonshme, të hartojë specifikime teknike ose të bëjë një referim të tillë të veçantë, nëse autoriteti kontraktues në mënyrë të qartë vërteton se, nuk është e mundur që të përpilojë një specifikim mjaft të saktë dhe të kuptueshëm të lëndës së kontratës përkatëse, në pajtim me paragrafin 3-6. të këtij neni ose ndryshe; me kusht që, çfarëdo referimi i tillë të shoqërohet me fjalët “ose ekuivalent”, thuhet në pjesën e dytë të kësaj pike të nenit 28.
Por, në disa nga produktet e cekura ka prodhime të Kosovës që kanë mundur të ceken dhe që janë mirë të njohura në Kosovë.
Kompania Prodhuese “Liri” tash e një kohë të gjatë prodhon keksin “Sempre” që janë ekuivalent me “Plazmën” që është prodhim i Serbisë.
Njëjtë është edhe me pashteten “Argeta që është cekur në tenderin e Agjencisë Qendrore të Prokurimit. Fabrika për përpunim të mishit, “MEKA” tash e një kohë të gjatë prodhon pashteta me shije të ndryshme.
AQP ka kërkuar të blejë 6 mijë copa kifle me ‘eurokrem’. Përveç kësaj ka kërkuar edhe 445,284 copa “Eurokrem’ ose ekuivalente prej 50 gr i paketuar në foli. Si dhe ka kërkuar 9,528 kilogram “Eurokrem” ose ekuivalent.
AQP-ja i ka kërkuar edhe keksët me emra të produkteve të caktuara. I ka kërkuar 5,937 copë “Plazma” apo keksë ekuivalent me paketim 150 gram. Si dhe i ka kërkuar edhe 8,418 kilogramë keksë “Petit Beure” ose ekuivalent.
Përveç tyre, AQP-ja ka kërkuar edhe djathëra me emra specifik të produkteve, përkundër që ka disa kompani që prodhojnë djathin në Kosovë.
AQP-ja po kërkon t’i blejë edhe 19,317 kilogram djath “ekuivalent” me feta i konservuar, paketimi 4 kg plastik ose në kënaqe. Si dhe 8,238 kilogramë të tjerë djath feta ose ekuivalent, por pa i specifikuar paketimin.
Janë kërkuar edhe pashteta me emër specifik të produktit të një prodhuesi të caktuar. Është kërkuar të blihet 365 mijë e 67 copa “pashteta pule “Argeta” ose ekuivalente. “Pashteta Pule ‘Argeta’ ose ekuivalente janë paraparë edhe në një llot tjetër, në sasi prej 127 mijë e 500 copa.
Lidhur me skandalin e AQP-së, kanë reaguar edhe dy prej prodhuesve më të mëdhenj në vend.
Drejtori i fabrikës për përpunimin e mishit “MEKA”, Burim Piraj, ka thënë se blerja e produkteve serbe duke anashkaluar ato vendore është praktikë e keqe.
Piraj për KALLXO.com, blerjen e këtyre produkteve nga institucionet e ka quajtur më shumë se diskriminim.
“Mendoj se është një praktikë e keqe e cila që nga e kaluara u kanë dhënë përparësi prodhimeve të huaja karshi atyre vendore, këtë nuk mund ta quajmë diskriminim sepse kjo është më tepër se aq”, ka thënë Piraj.
