Në mëngjesin e sotëm kanë rifilluar kërkimet për dy zyrtarët policor të Kosovës të cilët janë zhdukur mbrëmë në lumin Lepenc.
Zëdhënësi i Policisë së Kosovës, Bajram Krasniqi ka thënë për Insajderin, se kërkimet kanë rifilluar në mëngjesin e hershëm.
“Ju konfirmojë se kërkimet kanë rifilluar në mëngjesin e sotëm dhe deri më tani nuk ka asnjë të re nga vendi i ngjarjes, atje janë pjesëtarët e FSK dhe zjarrfikësit”, ka thënë Krasniqi.
Mbrëmjen e vonë të së shtunës, një veturë e Policisë së Kosovës në rrethana ende të panjohura ka rënë në lumin Lepenc.
Sipas raportimeve ende nuk dihen shkaqet që çuan deri në fundosjen e veturës policore në të cilën gjendeshin dhe dy pjesëtarë të policisë tashmë të zhdukur.
Sipas Zëdhënësit të policisë për rajonin e Ferizajt, Agim Gashi vetura kishte depërtuar urën:
‘’ Ende nuk dihen arsyet por vetura ka thyer barrierat e urës duke rënë poshtë’’ ka thënë ai.
Të gjitha njësitë relevantë janë në vendin e ngjarjes dhe po bëjnë përpjekje për të gjetur dy pjesëtarët e policisë.
