Ferizaj.17.02.2018. Manifestimet për shënimin e dhjetëvjetorit të Pavarësisë së Kosovës në Ferizaj kanë nis sot me homazhe në Varrezat e Dëshmorëve të UÇK-së. Me këtë rast, drejtues të pushtetit lokal e qendror, përfaqësues të subjekteve politike, shoqatave të luftës, familjarë të dëshmorëve dhe qytetarë të shumtë fillimisht kanë vendosur buqeta me lule pranë shtatorëve të dëshmorëve, Rexhep Bislimi, Hyrë Emini, Ahmet Kaçiku, Naim Beka, Afrim Kalanica, Driton Islami-Toni, Kemajl Hetemit, Brahim Ademit-TT-së për të vazhduar me pastaj marshutën në drejtim të varrezave të Dëshmorëve.
Aty ata janë përkulur para sakrificës sublime të dëshmorëve, duke thënë se kjo ditë reflekton momente gëzimi e krenarie.
Duke e kujtuar këtë ditë, Kemajl Bislimi, familjar i dëshmorit, Rexhep Bislimi, tha se kjo ditë shënon sublimimin e një përpjekjeje shumë shekullore të brezave të tërë që rezultoi me shpalljen e pavarësisë.
“Më kujtohet si sot para dhjetë viteshe kur nëna para televizorit priste momentin e konfirmimit që të shpallet Pavarësia e Kosovës. Mendoja se si ajo bijë e dëshmorit para vetit kishte dy fëmijët e Rexhës, po ashtu fëmijë të dëshmorit. Ishte një moment kur reflektoi dhe thosha se ajo gjatë tërë periudhës së vet nuk ka guxuar ta kujtoi e as ta përmend babain e saj si dëshmorë, kurse vetë fëmijët e saj sot po e prisnin atë mund dhe përpjekje të babait të tyre që kulmoi me Pavarësinë e Kosovës. E sot pas dhjetë vjetëve ne shohim të arritura të shumta që shpresojmë që do të marrin trajta të shtetndërtimit dhe prosperimit” theksoi Bislimi.
Në anën tjetër edhe kryetari i Shoqatës së Familjeve të Dëshmorëve(SHFD) Gafurr Bytyqi, tha se këtë ditë më mirë se çdokush tjetër e përjetojnë baballarët e dëshmorëve.
” E përjetojnë për ata se djemtë e tyre shkuan në përjetësi pikërisht për të ardhur tek kjo ditë kështu. Nëse gjykojmë në kontekst me kohën dhe hapësirën kurrë Kosova më mirë nuk ka qenë. Kjo është e vërteta e jo e atyre që shohin çdo gjë zi” theksoi Gafurr Bytyqi.
Gjatë ditës manifestimet për shënimin e kësaj dite kanë vazhduar edhe me një akademi solemne , ndërsa në mbrëmje është paraparë që të mbahet edhe gala koncert në Teatrin “Adriana”.
