Gjykata Themelore në Prishtinë ka shpallur fajtor dhe ka dënuar me 25 vjet burg të akuzuarin E.J për vrasjen e vëllait të gruas së tij, në mars të vitit 2014.
Gjykata Themelore në Prishtinë sot ka shpallur publikisht aktgjykimin me të cilin i akuzuari E. J. është shpallur fajtor dhe është dënuar me dënim unik burgu në kohëzgjatje prej 25 vjetëve për veprën penale “Vrasje e rëndë” dhe veprën penale “Mbajtje në pronësi, kontroll, posedim ose shfrytëzim të paautorizuar të armëve”.
Gjykata paraprakisht ka gjetur se i akuzuari E.J. është fajtor sepse me datën 08.03.2014, rreth orës 20.45 min., në rrugën “Shaip Spahija” (Mëhalla e Muhaxhirëve) në Prishtinë, për shkak të një mosmarrëveshjeje në mes të akuzuarit E.J. dhe bashkëshortes së tij M.J., si dhe me vëllain e bashkëshortes, tani të ndjerin B.K., dhe pasi që nuk kishin mundur të gjejnë një zgjidhje të duhur, i akuzuari kishte goditur tri herë me armë zjarri të ndjerin B.K., ku si pasojë e këtyre goditjeve i njëjti kishte vdekur.
Të akuzuarit E.J. i është llogaritur koha e kaluar në paraburgim nga dt.08.03.2014 dhe me aktvendim të veçantë të njëjtit, i është vazhduar paraburgimi deri në plotfuqishmërinë e këtij aktgjykimi, thuhet në një komunikatë për media.
