Ka qenë vetë autori Zaka, i cili së bashku me babanë e viktimës ka bërë kallëzimin në Policinë e Fierit se i kishin vrarë kushëririn Vladimir Murrizi, në Greqi.
Policia e Fierit në bashkëpunim me Interpolin dhe Policinë Greke ka bërë të mundur zbardhjen e krimit dhe gjetjen e trupit të viktimës.
“Më datën 07.08.2016, është paraqitur në Sektorin e Hetimit të Krimeve të rënda shtetasi Mersin Murrizi i cili ka kallëzuar se djali i tij, Vladimir Murrizi, është vrarë në Greqi, duke sjellë edhe si dëshmitar shtetasin Denis Zaka, kushëririn e parë të tij me të cilin ka qenë bashkë në Greqi”.
Lidhur me këtë kallëzim, policia thotë se u kryen veprimet procedurale si: pyetja e katër personave që kanë dijeni për veprën penale, u bë këqyrja e telefonave, tabulateve, SMS-ve dhe rrjeteve sociale me të cilët kishte komunikime.
Nga kryerja e veprimeve procedurale lindën dyshime të bazuara se Zaka ishte autori i dyshuar i vrasjes.
Sipas policisë, dyshimet kanë lindur gjatë intervistës së Denis Zakës, i cili kishte shumë kontradikta në thënie që nuk përputheshin me tabulatet telefonike.
I vendosur para provave kontradiktore për ato që kishte deklaruar, pranoi se ai e kishte kryer vrasjen e kushëririt të tij, shtetasit Vladimir Murrizi, duke dhënë shpjegime të hollësishme për motivin, mjetin me të cilin kishte realizuar vrasjen dhe vendin ku e kishte fshehur kufomën në Greqi.
Policia e Fierit bashkëpunoi me Drejtorinë për Krimet e Rënda dhe Interpol Tirana dhe të gjitha të dhënat ju përcollën menjëherë autoriteteve policore greke, të cilat nga ana e tyre shkuan në vendin e ngjarjes dhe gjetën kufomën e groposur.
.
