Ferizaj, 13 Korrik 2025 – Një vatër zjarri ka përfshirë mbrëmjen e sotme zonën malore përgjatë rrugës që lidh fshatin Nerodime e Epërme me fshatin Dremjak, në komunën e Ferizajt.
Lajmin e ka bërë të ditur Avni Nuhaj, përfaqësues i fshatit Nerodime e Epërme, i cili përmes një deklarate publike ka konfirmuar ndërhyrjen e shpejtë të njësive zjarrfikëse në terren.
“Përshëndetje për të gjithë! Kujdes me zjarret – sonte në rrugën për në fshatin Dremjak ka shpërthyer një zjarr në mal. E kam lajmëruar zjarrfikësit dhe për momentin janë në terren duke ndërhyrë për shuarjen e zjarrit. Të lutemi që të jemi të kujdesshëm me natyrën dhe të mos ndezim zjarre pa kontroll. Faleminderit për mirëkuptim!” – ka bërë thirrje Nuhaj.
Ai ka apeluar tek të gjithë qytetarët që të tregojnë kujdes të shtuar gjatë stinës së verës dhe të shmangin ndezjen e zjarreve të pakontrolluara, të cilat mund të rrezikojnë seriozisht mjedisin dhe pronën e banorëve.
Për momentin, zjarrfikësit janë duke vazhduar përpjekjet për lokalizimin dhe shuarjen e flakëve, ndërsa autoritetet kanë kërkuar bashkëpunimin e komunitetit për raportimin e çdo rreziku të mundshëm zjarri.
