Ditën ndërkombëtare të punëtorëve Lëvizja Vetëvendosje në Ferizaj, e shënoi me një aktivitet simbolik para komunës së Ferizajt.
Fazli Shabani nga ‘’Vetëvendosje’’ tha se organizimi i kësaj proteste është bërë në shenjë pakënaqësie me gjendjen e punëtorëve në sektorin privat.
“Të drejtat e punëtorëve fillojnë të shkelen qysh në kohën e nënshkrimit të kontratës, njerëzit në këto kontrata nuk kanë sigurime shëndetësore, siç e dimë ka pasur raste ku punëtorët kanë përfunduar me humbje jete dhe nuk marrin as dëmshpërblim as familja as askush. Shkeljet e të drejtave të punëtorëve janë edhe kur nënshkruan kontratë për një punë e bën krejt një punë tjetër, nënshkruan një kontratë me një pagesë të caktuar ndërsa rroga reale është krejt tjetër, nuk paguhet sigurimi, trusti pensional e vazhdojnë deri tek mungesa e komplet kushteve, ku punojnë nëpër ndërtesa shumë të larta dhe nuk kanë asnjë mjet sigurie për të siguruar jetën e tyre”,tha Shabani.
Në protestën e organizuar nga Lëvizja Vetëvendosje morën pjesë një numër shumë i vogël i protestuesve. Sipas Fazli Shabanit, interesimi i ulët i punëtorëve për protestë është për arsye se ata kanë frikë nga ndëshkimi që mund t’u ndodhë prej punëdhënësve.
“Protestimi në këto raste është një demokraci e mirëfilltë që tek ne mungon, nuk guxojnë punëtorët të protestojnë sot sepse ata mund të ndëshkohen dhe kemi shumë raste të ndëshkimit kur është protestuar, por është dhe pak kulturë e përgjithshme protestimi, pavarësisht se ti punon dhe ke një pjesë të kushteve, sot mund të protestohet që të ketë përmirësim të kushteve të punës”, theksoi Shabani.
Nga organizatorët u kritikuan organizatat joqeveritare dhe sindikatat e punëtorëve për mospjesëmarrje në këtë protestë. Sipas tyre, kjo është dëshmi se ato janë të kapura nga politika, transmeton Televizioni Tema.
