Greva në të gjitha institucionet arsimore në Kosovë ka hyrë në javën e dytë. Kryeministri i Kosovës, Ramush Haradinaj, ka thënë të hënën se Sindikata e Bashkuar e Arsimit, Shkencës dhe Kulturës (SBASHK) duhet ta shqyrtojë seriozisht ofertën e Qeverisë.
Haradinaj ka theksuar se oferta e dhënë është krejt ajo çfarë mund të bëjë aktualisht Qeveria.
“Kemi marrë veprimin më të madh të mundshëm që ka mundur të merret në këto rrethana. Tash ka mbetur që të reflektojnë dhe ta kuptojnë drejt se nuk jemi duke bërë pazar me ta [Sindikatën]. Në kemi bërë atë që ka qenë e mundur”, është shprehur Haradinaj.
Në orët e vona të së dielës, Haradinaj ka zhvilluar një takim me kryetarin e Sindikatës së Bashkuar për Arsim, Shkencë dhe Kulturë, Rrahman Jasharaj, duke i prezantuar ofertën e Qeverisë për rritjen e pagave në sektorin e arsimit.
Ai i ka ftuar të gjithë mësimdhënësit që t’i kthehen procesit mësimor, pasi Qeveria ka ofruar mbi 20 milionë euro më shumë për sektorin e arsimit, dhe sipas tij, “do të ishte një mashtrim nëse grevistët mendojnë se do ta kenë një ofertë tjetër”.
Përfaqësuesit e Sindikatës së Bashkuar të Arsimit, Shkencës dhe Kulturës, kanë thënë të hënën se greva do të vazhdojë deri në plotësimin e kërkesave.
Mësimdhënësit kanë kërkuar rritjen e pagës 30 për qind.
Mësimdhënësit në të gjitha nivelet publike të arsimit është thënë se po përdorin grevën si mjet për t’i bërë trysni Qeverisë së Kosovës që të ndryshojë Ligjin për pagat.
Sistemi arsimor në Kosovë është në grevë të përgjithshme prej 14 janarit.
