Vazhdon aksioni për largimin e mallrave serbe

Janë larguar edhe mallrat që si adresë kanë një qytet të caktuar e jo Republikën e Kosovës Komuna e Prishtinës bën të ditur se po vazhdon aksioni për largimin e mallrave serbe me mbishkrime antikushtetuese. “Inspektorët e Rendit Komunal, për të tretën ditë me radhë, kanë vazhduar aksionin për largimin e mallrave të importuar nga Serbia që i drejtohen Kosovës si “Kosove dhe Metohi”, “Kosovo Unmik”, “Kosovo 1244”, “Kosove Rezoluta 1244”, si dhe me emërtime të tjera në kundërshtim me emrin kushtetues të shtetit tonë”, bëhet e ditur në komunikatën e komunës së Prishtinës. Gjithashtu, siç njoftohet janë larguar edhe mallrat që si adresë kanë një qytet të caktuar, e jo Republikën e Kosovës. Aksioni siç bën të ditur komuna do të vazhdojë nëpër secilën pikë të shitjes brenda territorit të Kryeqytetit. Produktet e importuara nga Serbia dhe Bosnja për në Kosovë do të kenë taksë prej 100%. Qeveria e Kosovës ka miratuar para dy ditëve propozimin e Ministrit të Tregtisë dhe Industrisë, Endrit Shala për të vendosur taksë prej 100 për qind ndaj produkteve serbe dhe atyre nga Bosnja