Ferizaj.26.02.2018. Drejtori i Drejtorisë së Shërbimeve Publike dhe Emergjencë, Arben Halili lidhur me gjendjen e rrugëve në territorin e Ferizajt, pas reshjeve të borës ka mbajtur konferencë për medie, ku ndër të tjera është shprehur:
“Pavarësisht reshjeve të dendura të borës, që nga dje të gjitha rrugët në territorin e Ferizajt kanë qenë dhe janë të qarkullueshme. Mirëmbajtja e rrugëve nga bora është duke u bërë nga KRM “Pastërtia” dhe kompanitë private vullnetare të cilat që nga dita e djeshme janë vazhdimisht në terren dhe për këtë i falënderojmë publikisht- tha ai.
Ndër të tjera, drejtori Halili ka përmendur edhe mungesën e kontratës për mirëmbajtjen e rrugëve nga bora, gjegjësisht procesin e pa përmbyllur tenderues nga ish qeverisja.
“Theksoj se Komuna e Ferizajt ka trashëguar nga qeverisja e kaluar një proces tenderues të pa përmbyllur për pastrimin e borës, thënë thjesht nuk ka ende operatorë të kontraktuar për pastrimin e borës, andaj e gjitha puna në terren për pastrimin e borës është duke u bërë në baza vullnetare. Ekipet e sektorit të emergjencave kanë qenë edhe dje edhe sot në terren dhe deri në këto momente sipas raportimeve nga terreni, gjendja është nën kontroll dhe qarkullimi po vijon normalisht” – tha drejtori Halili.
Drejtori i DSHPE tha se Komuna e Ferizajt dhe kompanitë private janë mobilizuar me gjithë makineritë për tejkalimin e kësaj situate, ndonëse reshje të borës ka vazhdimisht.
Ai ndër të tjera kërkoi nga ngasësit e automjeteve t’i pajisin automjetet e tyre me pajisje dimërore si dhe të shmangin kalimin në zona të rrezikshme malore, siç është rruga që lidh fshatin Jezerc me Budakovën.
