Inspektorati Policor i Kosovës ka rekomanduar suspendimin e tre zyrtarëve policorë, një kapiteni, një rreshteri dhe një zyrtari policor, që të gjithë punonjës në Njësinë Rajonale të trafikut rrugor në Ferizaj.
Sipas njoftimit të IPK-së, zyrtarët dyshohet se kryer veprën penale “Keqpërdorim i pozitës apo autoritetit zyrtar”.
IPK ka thënë se përmes rrugëve operative kishte pranuar një informatë se më 15 prill 2022, zyrtarët policorë kanë ndaluar një qytetar për vozitje të shpejtë dhe ia kanë shqiptuar tiketën në vlerë 500 euro, një vit ndalesë të drejtimit të mjetit motorik dhe 5 pikë negative.
“Mirëpo, katër ditë pas shqiptimit të tiketës është anuluar tiketa e parë, i është kthyer patentë shoferi qytetarit dhe i është shqiptuar tiketë e re vëllait të qytetarit për vozitje pa patentë shofer duke e anashkaluar plotësisht Komisionin për Vendosje si autoritet i vetëm për anulimin ose jo të tiketave në trafikun rrugor, sidomos kur ka masë mbrojtëse”, bën të ditur IPK.
Inspektorati policor, ka shtuar se dyshimet e hetuesve të IPK-së janë se nga zyrtarët policorë, tashmë të suspenduar, është manipuluar tiketa dhe rasti.
Tutje IPK ka treguar se qytetarit iu ishte shqiptuar tiketa pasi ai ishte duke vozitur 104 km për orë në zonën ku kufizimi i shpejtësisë ishte 50 km për orë.
