Spitali i Ferizajt planifikohet të fillojë të ndërtohet më 12 Qershor

Pas harmonizimit të zbrazëtive ligjore në mbledhjen e djeshme të Kuvendit të Komunës së Ferizajt lidhur me tokën e destinuar për ndërtim të Spitalit të ri po planifikohet që ky projekt madhorë e i shumëpritur të fillojë së ndërtuari më 12 Qershor, në ditën e e çlirimit të Ferizajt.

Drejtori për urbanizëm dhe mjedis Lulzim Aliu pohon se është në përgatitje të lejes ndërtimore për këtë projekt , nga se të gjitha paqartësitë dhe barrierat ligjore tashmë janë eliminuar.
“ Të gjitha vendimet që i kemi marrë dje janë vendime për ndërtimin e Spitalit. Spitali do të ndërtohet shumë shpejt. E thash edhe dje se si datë referente do të jetë 12 Qershori i këtij viti. Të gjitha përgatitjet për leje të ndërtimit janë kryer sipas ligjeve të ndërtimit i cili është në fuqi dhe që ne jemi duke e aplikuar. Telashet i kemi pasur me interpretim të ligjit nga Ministria e Planifikimit. Dua të them se të gjitha vendimet që i kemi marrë edhe më herët, me 30 Mars, të cilat dje i kemi anuluar kanë qenë në përputhshmëri të plotë me udhëzimet që na ka dhënë Ministria para katër muajsh, kur kemi vendosur që të shqyrtojmë edhe njëherë PZHK-në për të përmirësuar disa gabime teknike që kanë qenë në PZHK e par të cilat ata nuk na kanë lejua. Na kanë dhënë udhëzime se si mundemi me I bërë përmirësimet hap pas hapi por për vendimet e 30 Marsit na kthyen krejt një përgjigje tjetër që për mua kanë qenë absolutisht të papranueshme. Megjithatë kryetari ka shprehur vullnetin e vet për të cilin unë nuk jam pajtuar sepse përgjigjen nuk na e kanë pruar me kohë dhe vendimet që janë marrë më parë kanë qenë të plotfuqishme. Ne kemi mund ta ndërtojmë spitalin edhe pa vendimet e djeshme. Në qoftë se me veprimin tonë komuna e shkel ligjin atëherë Ministria ka të drejtë ta padisë komunën përmes gjykatës. Po dje e kemi sjellë situatë që ne të fillojmë me lejen e ndërtimit e cila do të bëhet brenda dy apo tre ditësh” ka thënë Aliu.
Ndonëse në mbledhjen e djeshme të Kuvendit të Komunës së Ferizajt këshilltarët komunal nga radhët e opozitës thanë se fillimi i projektit në këtë fazë është I dëmshëm dhe se mund të ketë reagime negative nga ana e nivelit qendror, drejtori Aliu thotë se nuk mund të ketë reagime të tilla nga se tashmë janë të qarta të gjitha interpretimet ligjore.
“Edhe dje në mbledhjen e Kuvendit jam munduar me i sqarua dilemat dhe paqartësitë që i ka vet Ministria dhe dua ta them edhe këtë se gjithë këtë kaos të interpretimit të PZHK-së është bërë nga Ministria e Planifikimit dhe Mjedisit sepse ata vet kanë paqartësi shumë të mëdha në interpretim të ligjit dhe udhëzimeve administrative” ka thënë Aliu.
Spitali i ri për Ferizajn thuhet se është bërë me kërkesën e këtij institucioni që ai të ndërtohet tek hapësirat e ish tregut të kafshëve. Ndërkaq projekti nuk ka pësuar ndryshime nga ai i planifikuar në vitin te parku i Lirisë. Në parcelën e re thuhet se ka hapësirë më shumë dhe se duhet modifikuar elementet e ndërtimit, transmeton Televizioni Liria.