Komiteti për personat me aftësi të kufizuar i Kuvendit të Komunës së Ferizajt, mbajti sot një takim me shoqatat e personave me aftësi të kufizuar, përfaqësues të bizneseve, të organizatave joqeveritare, administratës tatimore dhe me zyrtarë të Komunës, për të parë mundësitë e lobimit tek institucionet shtetërore dhe tek bizneset, për punësimin e hendikepatëve, së paku në përuthje me normat ligjore.
Kryesuesi i Kuvendit të Komunës, Faruk Guri, tha se pushteti lokal po bën përpjekje për një infrastrukturë ligjore dhe infrastrukturë fizike, që u mundëson personave me aftësi të kufizuara qasje në institucione publike dhe realizimin e të drejtave të tyre.
Mirëpo, përfaqësues të organizatave që kujdesen për personat me aftësi të kufizuara, Xhemile Murseli nga Handikos dhe Fazile Bungu nga Hendifer, thanë se nuk janë të kënaqura me angazhimin e institucioneve shtetërore rreth punësimit të personave me aftësi të kufizuar. Ato u ankuan se numri i hendikepatëve të punësuar në institucione publike nuk është simbolik.
Pjesëmarrës të këtij tubimi theksuan nevojën e një plani të veprimit, hartimin e një databaze me shënimet e të gjithë personave me aftësi të kufizuara, formimin e listave me personat e aftë për punë, duke theksuar aftësitë, shkollimin dhe përvojën e punës, si dhe aftësimin e mëtejshëm profesional të tyre. Ndërsa drejtori i ATK-së në Ferizaj Avdi Jakupi, e theksoi lirimin e personave me aftësi të kufizuar nga tatimi në paga, nevojën që institucionet shtetërore ta mbështesin më tej këtë kategori dhe nevojën e aftësimit të hendikepatëve për tregun e punës.
Me propozimin e Nexhat Hasanit nga komuniteti i biznesit dhe ai i prindërve të fëmijëve me aftësi të kufizuara, u formua një komision, i cili do të loboj tek bizneset, për të përfshirë në punësim numër sa më të madh të personave me aftësi të kufizuara, si dhe për avancimin e mëtejmë të këtij komuniteti në të gjitha aspektet.
