Shkëndija pret Rosenborgun në kërkim të historisë

Shkëndija e Tetovës do të presë sonte në orën 20:15 gjigantët norvegjezë të Rosenborgut, në sfidën e kthimit të Play Off-it të Europa Leagues, një takim të cilin Supersport do ta sjellë live dhe ekskluzivisht për të gjithë sportdashësit shqiptarë.
Kuqezinjtë do të tentojnë historinë në stadiumin “Filipi II”, pasi do të zbresin në fushë me synimin për të eliminuar kundërshtarët dhe për të arritur për herë të parë në fazën e grupeve.
Rezultati i ndeshjes së parë, 3-1 për Rosenborgun, nuk është shumë shpresëdhënës, por loja e Shkëndijës në “Lerkendal Stadium”, bën që trajneri Qatip Osmani të shpresojë në një rezultat të mjaftueshëm për t’u kualifikuar më tej.
Kuqezinjtë e nisën eksperiencën europiane me eliminatoret e Champions League, ku arritën deri në turin e tretë dhe u eliminuan nga austriakët e Salzburgut, ndërsa më pas vijuan në Play Off-in e Europa Leagues.
Trajneri Qatip Osmani ka grupin e plotë në dispozicion dhe theksoi edhe në intervistën e parandeshjes, se skuadra është gati të tentojë mrekullinë në Shkup, për të shkruar historinë dhe për t’u bërë pjesë e grupeve të Europa Leagues.